Често може да се слушне дека јаглехидратите се најголемите „непријатели“ на оние кои сакаат да ослабат, но тие всушност му се неопходни на човечкото тело бидејќи го снабдуваат со енергија. Сепак, прекумерното внесување на јаглехидрати може да доведе до одредени нуспојави.
Според нутриционистката Џулијана Дуснеп, сложените јаглехидрати се многу пожелни во исхраната и за нив е потребно повеќе енергија и време за да се разложат во шеќер за енергија.
Многу сложени јаглехидрати се одличен извор на влакна и хранливи материи кои поттикнуваат губење на тежината, чувство на ситост и здравје на цревата. Сепак, поважно е да се фокусираме на квалитетот на јаглехидратите отколку на количината бидејќи тоа може да доведе до низа непријатни симптоми.
Подуени сте
Ако постојано сте подуени, причината може да бидат јаглехидратите. Шеќерот од јаглехидратите може да ја намали разновидноста на здравите бактерии во нашите црева, правејќи го нашиот дигестивен систем бавен, што потоа создава надуеност.
Покрај тоа, бактериите во вашето дебело црево ферментираат влакна, скроб и некои шеќери, кои произведуваат гасни соединенија во телото. Ова се случува најчесто кога консумираме рафинирани јаглехидрати.
Се дебелеете
Внесувањето вишок јаглехидрати може да доведе до вишок калории, бидејќи храната богата со јаглехидрати често е богата со масти. Слатките како колачите, покрај јаглехидрати, генерално содржат и големи количини на масти, кои се значително калорични. Освен тоа, луѓето често јадат јаглехидрати како компири со различни висококалорични сосови.
Имате акни
Иако акните се појавуваат за време на пубертетот, многу возрасни имаат проблеми со оваа непријатна појава. Акните можат да бидат предизвикани од нашата генетика и хормони, но може да бидат и знак дека јадеме премногу јаглехидрати. Шеќерите од јаглехидратите го зголемуваат производството на андрогени, кои се поврзани со хормоналните акни.
Имате проблеми со спиењето
Консумацијата на јаглехидрати бара од вашето тело да работи и да го преработува шеќерот, па ако ги јадете пред спиење, барате од вашето тело да работи, а не да се одмара.
Постојано сте уморни
Ако се чувствувате особено уморни, јаглехидратите би можеле да придонесат за таа летаргична состојба. Таканаречената мозочна магла и главоболките се исто така симптоми на прекумерна консумација на јаглехидрати. Кога избирате оброк базиран на јаглехидрати, важно е да го комбинирате со други хранливи материи како здрави протеини и масти.
Според „Sanford Health“, јадењето премногу јаглехидрати може да го зголеми шеќерот во крвта и да предизвика пад што прави да се чувствувате слабо. За да избегнете пад, внесувајте јаглехидрати заедно со други хранливи материи.
