Парискиот музеј Лувр ќе добие сликарско ремек-дело од 13 век, кое за малку ќе било фрлено во ѓубре. Станува збор за делото „Исмејуван Христос“, дело на италијанскиот сликар Чимабуе.
Уметноста, која беше прогласена за национално богатство, била пронајдена на ѕидот на кујна во Франција во 2019 година, во текот на чистењето на домот. Сопственичката на куќата, жена во десеттата деценија од животот, имала намера да ја фрли сликата во ѓубре. Таа верувала дека тоа е безвредна икона од Русија и сакала да ја фрли во ѓубре. Сепак, подоцна на аукција била продадена за дури 25 милиони долари.
Сликата ја купиле чилеанскиот милијардер Алваро Саие Бендек и неговата сопруга Гузман Анфелт за нивната приватна колекција. Сепак, француската влада не дозволила сликата да се извезе. Франција го препозна нејзиното културно значење и ја прогласи за национално богатство.
Државата му дала на Лувр 30 месеци да ги обезбеди средствата потребни за нејзино откупување. Сопствениците на сликата и музејот неодамна постигнаа договор, обезбедувајќи уметничкото дело да биде дел од колекцијата на светски познатиот музеј. Не е соопштено колкава сума платил Лувр за сликата.
Откритието на „Исмејуван Христос“ потсетува на неодамнешната ситуација во Шпанија, каде едно семејство сфатило дека во нивната соба со децении е сместено уметничко дело на фламанскиот сликар Ентони Ван Дајк, кое може да вреди милиони.
Брачен пар во Велика Британија пронашол 264 ретки златници додека го менувале подот во кујната, кои минатата година биле продадени на аукција за 845.000 долари, пишува „Business Insider“.
