Канцеларијата на окружниот обвинител на Менхетен ѝ претстави на големата порота, според Волстрит журнал, докази за поранешната Плејбој зајачица, Карен Мекдугал, која тврди дека имала интимна врска со поранешниот американски претседател Доналд Трамп на почетокот на 2006 година.
Волстрит журнал, исто така, во 2016 година напиша дека матичната компанија на американскиот таблоид National Enquirer, која ја поддржа првата претседателска кампања на Трамп, се согласила да ѝ плати на Мекдугал 150.000 долари за нејзината приказна за наводната афера. Таблоидот, сепак, на крајот не ги објави нејзините наводи, туку ја поништи приказната во медиумска тактика позната како „фати и убиј“, пишува Гардијан.
Инцидентот има клучни сличности со приказната на порно актерката Сторми Даниелс за нејзините наводни сексуални средби со Трамп од 2006 година наваму. Мајкл Коен, поранешниот адвокат на Трамп, ѝ дал на Даниелс 130.000 долари во 2016 година, а трансакцијата беше објавена дури во 2018 година.
Поранешниот американски претседател, откако беше обвинет за тајни плаќања на пари, „најверојатно“ ќе му биде предаден на судот дури во вторник и покрај различното барање на њујоршкиот обвинител Алвин Брег.
„Брег побара од вчера Трамп да му се предаде на судот, но рокот беше продолжен поради барањата на американските тајни служби поврзани со посебните услови за предавање на важна личност како што е поранешниот шеф на државата“, изјави изворот на порталот Фокс њуз и прецизираше дека Трамп „најверојатно“ ќе му биде предаден на судот во вторник следната недела.
Гласот на Америка претходно објави како изгледа протоколот по обвинението. По предавањето во полициска станица се земаат отпечатоци од прсти, обвинетиот се фотографира, се земаат неговите основни податоци, а потоа обвинетиот се притвора најмалку неколку часа.
Обвинетиот мора да го предаде својот мобилен телефон и други лични работи, а адвокатите честопати не можат да бидат со обвинетите кога поминуваат низ овој процес и да ги советуваат да не даваат никакви изјави.
Одлуката за обвинение против поранешниот американски претседател Доналд Трамп следува по истрагата за тоа дали Трамп фалсификувал деловни документи кога ѝ платил на Даниелс 130.000 долари преку својот адвокат за да ја спречи да зборува за нивната наводна афера.
Трамп е првиот американски претседател во историјата кој е кривично гонет.
