(Видео) Мицкоски нуди план за справување со енергетската криза: Двојно поевтина струја и спречување на инфлацијата

Макфакс

28/09/2022

15:26

844

Големина на фонт

а а а

Лидерот на ВМРО-ДПМНЕ, Христијан Мицкоски, заедно со тимот претставници на највисокото раководство на партијата, вклучително и голем дел од градоначалници имаше состанок со раководството на Сојузот на стопански комори на Македонија. Тие разговараа за актуелната состојба во државата и предизвиците со коишто се соочува бизнисот.

„Сите контакти коишто ги имаме на располагање, коишто се последица на нашиот животен пат, успеваме да ги исконтактираме изминатиот период и ги ставаме на располагање на бизнисот, а со цел да помогнеме најмалку 650.000 наши сограѓани коишто работат во приватниот сектор да ги задржат своите работни места имајќи предвид дека големи производствени капацитети своето производство го ставија во мирување и голем број наши сограѓани ги изгубија своите работни места. Меѓу поголемите тука би ги набројал Фени – комбинатот во Кавадарци, Бучим – комбинатот во Радовиш, но и други комбинати коишто значително учествуваат во зголемувањето на бруто-домашниот производ на Македонија.

Ќе повторам, ги ставаме на располагање на бизнис-заедницата, а индиректно и на Владата во овие тешки времиња кога гледаме дека државата полека но сигурно влегува во амбис, сите наши контакти за да обезбедиме ресурси со коишто ќе произведеме електрична енергија, којашто ќе биде најмалку двојно поевтина од таа којашто е на референтната берза – HUPX. И истата да ја користи стопанството, а со цел да спасиме стотици илјади работни места во периодот што следи. А граѓаните коишто се корисници, но и институциите коишто се корисници на централното затоплување во Градот Скопје да не добијат повисоки сметки за парно.

И вториот предлог што исто така јавно сакаме да го соопштиме е предлог-закон со којшто ќе бараме измена на Законот за енергетика, којшто до крајот на оваа недела или на почетокот на следната недела ќе биде доставен во собраниска процедура. Со него ќе побараме сите претпријатија коишто вршат јавна дејност во делот на комуналните услуги, водостопанството, но исто така и објектите во образованието, објектите во јавното здравство да бидат вратени онаму каде што им е местото, на регулиран пазар. Зошто ова го велам? Затоа што доколку овие три групи на субјекти продолжат вака да функционираат тоа ќе значи дека сите оние претпријатија кои вршат јавна дејност, без разлика дали е комунална или водостопанска коишто ќе ги декларираат своите трошоци пред Регулаторната комисија за регулирање на цени за енергија и вода, по сила на правилникот ќе ги зголемат своите цени за најмалку два до три пати, а тој шок ќе го почувствуваат индустријата и граѓаните. Ќе предизвикаат дополнително губење на работни места и дополнително намалување на куповната моќ и стандардот на граѓаните.

Зошто велиме за училиштата, затоа што ние не сме децата да учат онлајн туку да бидат онаму каде што им е местото, во училишните клупи. На тој начин ќе го олесниме животот и на родителите, коишто мака ќе мачат доколку децата повторно учат онлајн наместо во училишни клупи да најдат кој да биде со нив додека го поминуваат времето во домовите.

И конечно третото, да им го олесниме начинот на функционирање на јавните здравствени установи кои тонат во долгови, наместо профитите да завршуваат во компании кои препродаваат електрична енергија, да можат да се ослободат од тој притисок и тие средства да ги искористат за подобрување на здравствените услуги на пациентите и нега на пациентите“, рече Мицкоски.

Тоа се двете пораки кои Мицкоски денеска ги испрати до Владата.



Спонзорирани линкови

Маркетинг