Убиството на Афроамериканецот Џорџ Флојд е вест која се проширила во целиот свет. Со голема брзина било споделувано и видеото на кое се гледа како полицаецот Дерек Човин клечи на неговиот врат, а малку е познато дека снимката ја направила една тинејџерка.
Дарнела Фрејзер (17) била во прошетка со својот 9-годишен роднина, кога застанала пред киоск за брза храна во Минеаполис, а потоа видела како четворица полицајци го извлекуваат Афроамериканецот од автомобилот.
"Немала претстава дека ќе биде сведок и ќе документира еден важен настан во американската историја, полициско убиство. Да не биле нејзините храброст, смиреност и желба видеото да го постави на Фејсбук, сите полицајци и натаму ќе беа на улица и веројатно ќе тероризираа други членови на нашата заедница", рекол нејзиниот правен застапник Сет Кобин.
Дарнела не ни помислила дека снимката која ќе ја направи ќе го обиколи светот и ќе предизвика масовни протести ширум Америка. Кобин наведува дека таа не сакала да биде херој, туку дека е само ученичка која ја направила вистинската работа.
"Таа е Роза Паркс на својата генерација", рекол тој. Дарнела откако го објавило видеото само еднаш зборувала за јавноста. Тогаш рекла дека светот морал да го види тоа што го видела таа, и дека такви работи се случуваат многу често.
