Францускиот произведувач на женевскиот авто-салон го претставил единствениот автомобил со кој му даваа почит на легендарниот, предвоен "Bugatti Type 57 SC Atlantic".
"Bugatti La Voiture Noire" е окарактеризиран како "ултимативен GT автомобил", а базиран е на стандардната верзија на "Bugatti Chiron".
Во склад со своето име е офарбан во црно, а рачно правената каросерија е направена од карбон влакна.
Во "Bugatti" велат дека при дизајнирањето најмногу внимание посветиле на аеродинамиката на возилото, за автомобилот да има што пофлуидна линија.
Со оглед на тоа дека е заснован на "Chiron", под хаубата нема изненадувања. За погон е употребен 8.0 W16 со 4 турбини, кои испорачуваат 1.500 коњски сили и 1.600 Nm максимален обртен момент.
Перформансите засега не се соопштени.
Освен што е најскап автомобил изложен на женевскиот саем за автомобили, "Bugatti La Voiture Noire" станал и најскап нов автомобил на сите времиња, бидејќи однапред е продаден за 16,7 милиони евра.
Се шпекулира дека купец е 81-годишниот Фердинанд Пиех, поранешен директор на "Volkswagen Group", внук на Фердинанд Порше.
