Тензично на Комисијата за европски прашања, пратениците од опозициската ВМРО-ДПМНЕ бурно реагираа на коментарите на пратеникот на СДСМ, Петар Атанасов, кој, според нив, ги навредил.
„Доста сме заложници на една политички забегана заедница. Вие го предадовте народот на Македонија. Сами ја навредувате вашата интелигенција зашто веќе втора година блокирате работа. За првпат може да одиме напред. Овој закон треба да го одблокира политичкиот процес, граѓаните да си го кажат своето. Премногу долго сте во институциите”, рече пратеникот на СДСМ Петар Атанасов обраќајќи им се на колегите од ВМРО-ДПМНЕ.
Пратениците на ВМРО-ДПМНЕ зборовите на Атанасов ги оценија како навреда, на што жестоко реагираа. Додека Атанасов зборуваше на говорницата, тие дофрлуваа од страна.
Пратеничката од ВМРО-ДПМНЕ, Невена Стаменковска, побара извинување од Атанасов поради навредата.
Додека пратеничката Жаклина Пешевска зборуваше на говорница, Груби даде втора пауза на комисијата бидејќи поминало времето предвидено со деловникот. И покрај тоа што пратениците од мнозинството ја напуштаа салата, таа продолжи да ги образложува своите ставови.
