Технолошкиот титан Илон Маск испраќа инженери од двете негови компании со цел да ѝ помогнат на Тајландската влада во спасувањето на 12-те деца и нивниот фудбалски тренер кои се заглавени во пештера веќе две недели.
“Инженери од Space X & Boring Co се упатија кон Тајланд со цел да видиме дали можеме да ѝ помогнеме на владата во спасувањето”, напишал Маск на својот Твитер профил.
Маск вели дека технологијата на неговата компанија “Boring Co” може да помогне во спасувачката мисија поради тоа што е добра во копање дупки и поседува напреден пробивен радар.
Boring Co has advanced ground penetrating radar & is pretty good at digging holes. Don’t know if pump rate is limited by electric power or pumps are too smal. If so, could dropship fully charged Powerpacks and pumps.
— Elon Musk (@elonmusk) July 5, 2018
Исто така, тој предложил решение да се вметне најлонска цевка во пештерата која потоа би се надувала, со цел да се создаде подводен воздушен тунел.
Maybe worth trying: insert a 1m diameter nylon tube (or shorter set of tubes for most difficult sections) through cave network & inflate with air like a bouncy castle. Should create an air tunnel underwater against cave roof & auto-conform to odd shapes like the 70cm hole.
— Elon Musk (@elonmusk) July 6, 2018
Децата биле пријавени како исчезнати на 23-ти јуни откако влегле во пештерата Там Луанг по фудбалскиот тренинг и оттогаш им се губи секаква трага. Наскоро било утврдено дека поради обилниот дожд, нивото на водата се подигнало со што им се блокирал излезот. Во спасувачката мисија која брои околу 1000 лица се приклучиле и интернационални експерти.
На 2-ри јули, нуркачите ги лоцирале децата на возраст од 11 до 16 години и нивниот 25-годишен тренер, на површина опколена со вода, и ги снабдиле со вода, храна и лекови.
Сè уште не се познати деталите како спасувачите ќе продолжат да ги снабдуваат децата со храна и вода, особено по вчерашната вест за поранешниот маринец кој се удави откако изгубил свест во еден од пештерските премини.
Спасувачите досега извадиле над 30 милиони галони вода, а целосното отстранување на водата би помогнало во спасување на децата, но ваквата постапка е отежнета поради дождливата сезона во Тајланд.
Како други опции се напоменуваат и бушење на дупка во земјата до пештерата со цел да се отстрани водата, а потоа со помош на нуркачка опрема да се извадат децата, но ваквата опција се смета за најопасна бидејќи момчињата не знаат да пливаат и не се обучени нуркачи.
Маск на Твитер започнал разговор со Џејмс Јенбамрунг, извршен директор на тајландската компанија “mu Space” за можните решенија, но сè уште е рано да се зборува како спасувачкиот тим ќе одлучи да продолжи понатаму.
Good idea. Looking into cross sections and lengths of each section. The critical 70cm cross section area has 15m in length. And we believe 2km away from entrance where pumps should be. pic.twitter.com/RxmrBfpFgG
— James Yenbamroong (@JamesWorldSpace) July 6, 2018
Според временските прогнози, во Тајланд се очекуваат поројни дождови во следните денови, почнувајќи од денеска па сè до 12-ти јули.