Заменик-претседателот на Владата задолжен за европски прашања, Бујар Османи, и министерот за надворешни Работи, Никола Димитров, во рамките на посетата на Брисел имаа работна средба со еврокомесарот за проширување и соседска политика, Јоханес Хан, каде што беа отворени сите прашања поврзани со европската агенда на Република Македонија.
Османи реферира за посветеноста на Република Македонија на реформскиот процес наведувајќи ги одржаните локани избори, чие успешно спроведување претставува круна на делот три од планот 3-6-9. Османи потенцира дека по завршувањето на изборите, реформите се повторно во главниот фокусот на Владата, чија интенција е во целост да ги вклучи во планот 3-6-9 сите забелешки и барања од страна на меѓународните партнери и во целост да го имплементира. Тоа, заедно со отстранувањето и на другите политички пречки на патот на европските интеграции на Република Македонија, Османи очекува да резултира со конкретни чекори од страна на Унијата, но и на нејзините земји членки, а во насока на визибилноста на европските перспективи на Македонија.
„Нашата намера е до крајот на оваа година да испорачаме солиден напредок во имплементацијата на реформите, кој би ни обезбедил отстранување на условеноста на препораката, нешто што, соодветно на испорачаните реформи, очекуваме да резултира со позитивен извештај и чиста препорака од страна на Комисијата во април в година“, истакна Османи. Тој додаде дека соодветно на отстранувањето и на другите политички пречки за напредок во евроинтегративните процеси, како што се односите со соседите и внатрешните политички прашања, очекува и напредок од стана на Европскиот совет во јуни/јули в година за кога се надева на одлука за почеток на преговорите за полноправно членство во Европската Унија.
Османи го истакна новиот европски оптимизам што владее во Република Македонија, оптимизам кој се забележува и во целиот регион, а кој е сѐ поочигледен и кај поголемиот број земји членки на Европската Унија. „За нас, 2018 година претставува историска шанса кога сите коцки се наредени за да го направиме клучниот исчекор и конечно да го затвориме прашањето за НАТО и ЕУ“, истакна Османи.
Во рамките на посетата Османи и Димитров имаа работен појадок со министрите за надворешни работи на земјите членки на ЕУ, каде што реферираа за напредокот во исполнувањето на обврските што потекнуваат од евроитегративните процеси, а утре треба да имаат средба и со потпретседателката и висока претставничка за надворешна и безбедносна политика, Фредерика Могерини. Во агендата на Османи има и обраќање пред независниот тинк-тенк институт, Европскиот центар за политика (EPC), на тема, „Планот 3-6-9: понатамошно унапредување на процесот на интеграција на Македонија во ЕУ“, а на маргините на посетата ќе оствари средба и со директорката за Западен Балкан во ГД НЕАР, Геновева Руиз Калавера.
