Коѕијас: Заедничка комисија ќе го отстранува иредентизмот од македонските учебници

Макфакс

29/09/2017

09:25

291

Големина на фонт

а а а

Треба да се почекаат изборите во октомври и да се види дали новата Влада во Скопје ќе ја зацврсти својата позиција за да можеме да влеземе во посериозни преговори за решавање на прашањето за името, изјави грчкиот министер за надворешни работи, Никос Коѕијас, во интервју за националната телевизија ЕРТ.

Според Коѕијас, зад проблемот за името се крие и проблемот со иредентизмот кај северниот сосед.

– Се надевам и верувам дека од нивна страна ќе бидат преземени мерки за ограничување на иредентизмот – вели шефот на грчката дипломатија.

За тоа, како што посочува, во Њујорк разговарал со својот македонски колега Никола Димитров оценувајќи го како извонредно интересна личност.

– Се договоривме да формираме заедничка комисија од ноември годинава, која во рок од четири месеци ќе треба да си ја заврши својата работа – отстранување на иредентизмот од учебниците и географските карти во нив. Тоа е многу важен чекор, а следуваат и други чекори за кои веќе разговараме – изјави Коѕијас.

Прашан дали е можно приклучување на Македонија во НАТО и ЕУ, без решавање на прашањето за името, Коѕијас нагласува дека е неопходно првин да се затвори ова прашање како што е предвидено и со Привремената спогодба потпишана во средината на 90 години.

– Нашата соседна и нагласувам, пријателска земја бидејќи нашите народи имаат многу пријателски односи, не може да се приклучи во меѓународните организации како што се НАТО и ЕУ, без да се реши прашањето за името, што е предвидено и со Привремената спогодба. Недостигот на Привремената спогодба беше тоа што предвидуваше спорот за името да биде решен бргу, што би ѝ овозможило на соседната земја да се приклучи во меѓународните организации, но не предвидуваше кои мерки да бидат преземени ако не се најде решение. Всушност, во изминатите децении немавме суштински преговори – изјави Коѕијас.

За пишувањата во грчките медиуми дека предлогот на Атина за решавање на проблемот е името Вардарска Македонија, Коѕијас вели дека од грчка страна не се дадени никакви предлози, а објавените написи во кои се тврди спротивното ги смета за слободни новинарски толкувања.