Пратеникот Реџеп Исмаил од Левица го критикува Предлог-буџетот за 2027 година, нагласувајќи дека Владата вложува значајни средства во милитаризација и НАТО, додека ги намалува буџетите за социјална заштита, детски програми и превенција од насилство.
На денешната прес-конференција, по повод почетокот на амандманската расправа за Предлог-буџетот за 2027 година, пратеникот од Левица, Реџеп Исмаил, посочи дека буџетските приоритети на Владата откриваат поразителна политика во однос на безбедноста на граѓаните. Додека стотици милиони евра се издвојуваат за милитаризација и исполнување на обврските кон НАТО, се кратат средствата за социјална заштита, детски додатоци, родова еднаквост и институциите задолжени за заштита и спасување, посочи тој.
Исмаил
„Очигледно е дека безбедноста за оваа Влада значи само вложување во милитаризацијата на општеството“, истакна Исмаил, посочувајќи дека за Министерството за одбрана во 2027 година се предвидени над 412 милиони евра, со раст на средствата од основниот буџет за речиси 20%, додека истовремено средствата за Дирекцијата за заштита и спасување се намалуваат за дури 17%.
Програми
Како што кажа тој, има кратењата и во програмите што треба да обезбедат социјална сигурност и превенција од насилството. „Средствата за социјални услуги се намалуваат од 15,2 на 12,8 милиони евра, се кратат средствата за детски додаток, а програмата за родова еднаквост и недискриминација останува со дури 40% помалку средства. Ваквите кратења се случуваат токму во период кога јавноста речиси секојдневно сведочи на нови случаи на семејно и родово базирано насилство и фемициди“.
Проблеми
Исмаил нагласи дека проблемот не е само во неспособноста на институциите да се справат со последиците од насилството, туку и во целосното игнорирање на општествените околности во кои тоа се создава. Наместо зајакнување на социјалните служби, образованието, културата и програмите за превенција, Владата, според него, ги потчинува овие потреби на политиката на милитаризација и исполнување на надворешни барања.
Порака
„Не е доволно само да се осуди насилството откако тоа ќе се случи“, порача Исмаил, потенцирајќи дека суштинската безбедност подразбира создавање социјални, образовни и културни услови во кои насилството ќе се спречува, наместо институциите да реагираат дури откако ќе настапат трагичните последици.
Амандамани
Токму затоа, дел од амандманите на Левица, предвидуваат кратење на средствата наменети за милитаризација и за инфраструктурните проекти долж Коридорот 8, кои Исмаил ги оцени како непотребни и неисплатливи, и нивно пренасочување кон социјалните програми, зајакнување на службите за социјална заштита, подобрување на образованието и збогатување на културната понуда.
Буџет
Пораката на Левица е дека буџетот мора да им служи на вистинските потреби на граѓаните, наместо социјалната сигурност и превенцијата на насилството да се жртвуваат за милитаризација и инфраструктурни проекти диктирани од надворешни приоритети.
















