Јужна Кореја стана четврта земја што остварила годишен извоз поголем од билион долари. Рекордот е поттикнат од побарувачката за полупроводници, но придобивките сè уште не се чувствуваат подеднакво во целата економија.
Јужнокорејскиот извоз надмина билион американски долари од почетокот на годинава, соопшти Министерството за трговија во четвртокот, 19 ноември. Земјата стана четврта што го достигнала овој праг, по Германија, САД и Кина.
Границата беше помината во 05:09 часот по Гринич, односно 06:09 по Скопје. Ланскиот рекорд изнесувал 709 милијарди долари, пренесува Ројтерс.

Товарниот терминал во Бусан — архивска фотографија од 2007 година. Фото: Martin Pueschel / Wikimedia Commons, CC BY-SA 3.0.
Рекордот го носат полупроводниците
Главниот двигател е глобалната побарувачка за чипови за вештачка интелигенција. Во првите девет месеци, извозот на полупроводници пораснал за 184 проценти на годишно ниво и достигнал 42 проценти од вкупниот извоз. Автомобилите, челикот и бродоградбата заостануваат зад овој раст.
Претседателот Ли Џе-мјунг порача дека рекордот треба да се претвори во одржлив развој и подобар живот за граѓаните. Домашната побарувачка останува слаба, а придобивките од извозниот бум сè уште не стигнале до многу домаќинства.
Министерството најави посилна трговска соработка и постабилни услови за компаниите, објави Јонхап. Резултатот е прв ваков пресврт по речиси две децении: претходната нова членка на клубот со билионски извоз била Кина во 2007 година.












