Брисел предложи нов заем за Украина од 45 милијарди евра

Макфакс

18/11/2026

16:30

92

Големина на фонт

а а а

Европската комисија предложи заем од 45 милијарди евра за Украина, со цел да ја поддржи финансиската и воената стабилност на земјата, при што средствата ќе бидат обезбедени преку заедничко задолжување на ЕУ и државите членки.

Европската комисија предложи нов заем за Украина во износ од 45 милијарди евра, кој би бил обезбеден со заедничко задолжување на Европската Унија на финансиските пазари, со гаранции од европскиот буџет, изјави денес претседателката на Комисијата, Урсула фон дер Лајен.

Според овој предлог, 20 милијарди евра би биле наменети за финансирање на основните граѓански услуги во Украина, како што се болниците и училиштата, додека 25 милијарди евра би биле насочени кон воените потреби на Киев.

Фон дер Лајен нагласи дека Украина ќе мора да го врати овој заем дури откако Русија ќе ги надомести воените штети, додека Унијата ќе ги искористи средствата од замрзнатите руски средства за да го отплати долгот во меѓувреме.

Германија е подготвена да го поддржи овој предлог, но инсистира сите членки на Унијата да учествуваат во новата програма, откако Унгарија, Чешка и Словачка одбија да учествуваат во претходниот заем.

Европските лидери ќе го разгледаат овој предлог следната недела во Брисел, а Комисијата ги предупреди членовите дека трошоците за камата за двата заема ќе достигнат околу 40 милијарди евра, што ќе треба да се земе предвид при усвојувањето на новиот седумгодишен буџет на ЕУ за периодот од 2028 до 2034 година.