Денес полициските автомобили во Обединетите Арапски Емирати се познати по егзотичните модели, од суперавтомобили до електрични возила со високи перформанси.

Сепак, традицијата на користење спортски автомобили за полициски цели започнала пред речиси половина век – со моделот „Porsche 924“.

Компанијата „Porsche“ штотуку ја заврши темелната реставрација на овој историски примерок, кој го обновија стручњаци од центрите на „Porsche“ во Абу Даби и Ал Аин.

Автомобилот е произведен во 1979 година и бил првиот спортски модел во возниот парк на федералната полиција на ОАЕ.

Неговата посебна задача била да ја придружува кралицата Елизабета II за време на нејзината прва официјална кралска посета на тогаш новата држава.

За време на реставрацијата, посебно внимание било посветено на враќањето на автомобилот во првобитната состојба.

Полициските ознаки не биле реконструирани со налепници, туку повторно биле испишани со боја, како на оригиналното возило.

Реставрираниот „Porsche 924“ првпат ќе биде јавно претставен на фестивалот „Icons of Porsche“ во Дубаи, на 21 и 22 ноември.

Потоа автомобилот ќе биде изложен во музејот Ал Макта во Абу Даби.

Моделот што ја промени историјата на компанијата „Porsche“

„Porsche 924“ беше претставен во 1976 година, а првично се развивал за „Volkswagen“ како наследник на моделот „VW-Porsche 914“.

Кога „Volkswagen“ се откажал од проектот во 1974 година, „Porsche“ го презел развојот и го претворил во свој попристапен спортски автомобил.

Тоа бил првиот сериски „Porsche“ со мотор поставен напред и со водено ладење.

Четирицилиндричниот агрегат од 2,0 литри, со потекло од „Audi“, развивал 123 коњски сили.

Менувачот и диференцијалот биле сместени назад, што овозможувало порамномерна распределба на масата и подобри возни карактеристики.

И покрај почетните критики од традиционалните љубители на марката, „924“ станал комерцијален успех. Понудата подоцна била проширена со верзиите „924 Turbo“, „Carrera GT“ и „Carrera GTS“, а моделот послужил и како основа за развој на моделот „944“.

Производството завршило во 1988 година, откако биле направени околу 325.000 примероци од моделот „924“ и неговите варијанти.