Русија започна да користи алтернативна арктичка поморска рута низ Мурманск за извоз на пченица, поради ограничувања и напади на традиционалните извозни рути во Црното и Балтичкото Море. Оваа промена има за цел да овозможи непречена испорака на жито кон меѓународните пазари.
Русија, најголемиот светски извозник на пченица, за првпат се сврте кон арктичката поморска рута за испорака на жито на меѓународните пазари, барајќи алтернативи за своите пристаништа на Црното и Балтичкото Море. Трговското пристаниште Мурманск и компанијата за трговија со жито „Деметра Холдинг“ соопштија дека во тек е утовар на 3.400 тони жито од „клучни земјоделски региони“.
Мурманск се наоѓа во Колскиот Залив на Баренцовото Море; неговото пристаниште останува без мраз, иако градот лежи 200 километри северно од Арктичкиот круг. Тоа е едно од најважните пристаништа во северна Русија, кое служи како матично пристаниште за рибарска флота и мразокршачи на западниот крај на Северната поморска рута.
„Во време кога традиционалните извозни рути се соочуваат со ограничувања, Трговското пристаниште Мурманск забрзано отвора алтернативен пат преку кој руските земјоделски производители можат да стигнат до странските пазари“, се наведува во соопштението за јавноста од пристаништето.
Русија ги прилагодува своите извозни рути поради честите напади со беспилотни летала врз бродови во Црното и Азовското Море, со зголемување на пратките со жито преку Каспиското Море.
Приближно 28.000 тони пченица треба да бидат натоварени во Мурманск на брод што се упатува кон мароканското пристаниште Казабланка, објави Ројтерс, повикувајќи се на податоци за поморскиот сообраќај и неименувани индустриски извори.
Русија ја пренасочи пченицата наменета за извоз првенствено кон балтичките пристаништа, кои во септември обработија 1,2 милиони тони – што претставува над 60 проценти од вкупниот руски извоз на жито по море. Компаниите ги пренаменија терминалите што претходно се користеа за товарење ѓубрива и јаглен, прилагодувајќи ги за испораки на жито, забележува Ројтерс.
