Шпанскиот премиер Педро Санчез изрази жалење поради тешката железничка несреќа близу Урда и прогласи тридневна жалост, истакнувајќи дека е неприфатливо за Шпанија да има две несреќи со брзи возови во иста година. Истрагата ќе ги утврдува причините за трагедијата и одговорноста.
Шпанскиот премиер, Педро Санчез, изјави од командниот центар во Лос Јебенес дека цела Шпанија е во жалост по тешката железничка несреќа во близина на Урда. Владата прогласи тридневна официјална жалост, а Санчез наведе дека моменталните приоритети се пронаоѓање на преживеаните, помош за повредените и нивните семејства, како и утврдување на причините за трагедијата.
„Ќе ја расчистиме работата до крај. Ако имало небрежност, таа ќе излезе на виделина. Ако имало системски пропусти, ќе реагираме со апсолутна одлучност“, рече Санчез.
#EnDirecto | Sánchez anuncia que se declararán 3 días de luto oficial tras el accidente ferroviario en Toledo: "España está de luto y abraza a sus víctimas" https://t.co/issSXXPABD https://t.co/FFkc1ZGnz5
— Europa Press (@europapress) October 28, 2026
Премиерот посебно нагласи дека ова е вторпат оваа година Шпанија да се соочи со тешка несреќа на брз воз. Претходно оваа година, 46 лица загинаа во судир во близина на Адамуз.
„Неприфатливо е за земја како Шпанија да доживее две несреќи со брзи возови во иста година“, изјави Санчез.
Тој нагласи дека истрагата сега мора прецизно да утврди што се случило и дали постои некаква поединечна или системска одговорност.
Најмалку 68 лица загинаа, а десетици се повредени по судирот на два брзи воза во близина на Урда, во провинцијата Толедо. Меѓу загинатите е и поранешната шпанска министерка за труд, Фатима Бањес.
Министерот за транспорт, Оскар Пуенте, претходно изјави дека контролниот центар му дозволил на еден од возовите да го продолжи патувањето, иако сигналот бил црвен, а пругата била зафатена. Тој рече дека информациите собрани досега укажуваат на човечка грешка.
