Сега италијански археолози под црквата на Светиот гроб во Ерусалим откриле остатоци од гробишта кои се совпаѓаат со библиските описи на погребувањето на Исус.

Христијаните со векови веруваат дека токму на тоа место, кое се наоѓа во христијанскиот кварт на Стариот град во Ерусалим, Исус бил распнат, погребан и воскреснал, пишува „Јуроњуз“.

Првата црква на ова место била изградена по наредба на римскиот император Константин Велики, а била осветена во 335 година. Низ историјата, градбата повеќепати била уништувана и обновувана, а најголемите оштетувања ги претрпела во 1009 година, за време на владеењето на фатимидскиот калиф Ал-Хаким.

Откако крстоносците го освоиле Ерусалим во 1099 година, следувале обемни реконструкции кои го обликувале денешниот изглед на базиликата.

Бидејќи управувањето со црквата е поделено меѓу неколку христијански верски заедници, со векови било речиси невозможно да се изведуваат какви било градежни зафати. Дури неодамна бил постигнат договор што овозможил во 2016 година да започне обновата, прва по повеќе од два векови.

Градина и гробници под базиликата

Сеопфатната обнова на подот на црквата, планирана за 2022 година, со напредувањето на работите прераснала во обемно археолошко истражување.

Под денешната градба, археолозите откриле траги од напуштен каменолом, остатоци од земјоделски парцели, градина и гробници издлабени во карпа.

Совпаѓање со библиските описи

Откритијата се значајни бидејќи се совпаѓаат со записите од Новиот завет. Во Евангелието според Јован се споменува градина на местото на распнувањето, додека во Посланието до Евреите се наведува дека Исус бил погубен надвор од градските ѕидини, што одговара на локацијата на археолошкото наоѓалиште.

Главната археологинка Франческа Романа Стасола од Универзитетот „Ла Сапиенца“ во Рим објаснила дека наодите укажуваат на постоење на простор што некогаш се користел за погребување. Според нејзините зборови, ископувањата сугерираат дека меѓу Голгота, позната и како Калварија и гробот некогаш се простирало обработливо земјиште.

Археолозите пронашле и траги од маслинови дрвја и винова лоза кои потекнуваат приближно од 33 година од нашата ера, периодот во кој се смета дека починал Исус.

Стасола истакнала дека гробниците издлабени во карпа дополнително потврдуваат дека станува збор за постаро место за погребување. Овој детаљ се совпаѓа со описите во евангелијата според Матеј, Марко и Лука, каде што гробот на Исус е опишан како комора издлабена во карпа.

Без конечен доказ

Сепак, овие наоди не претставуваат научен доказ дека Исус бил погребан токму на ова место. Не постои натпис што би го потврдил тоа, ниту пак може да се утврди дали пронајдената гробна комора била претходно некористена или му припаѓала на Јосиф од Ариматеја, кој, според евангелијата, го положил телото на Исус во својот нов гроб. Покрај тоа, растителните остатоци сè уште не можат со целосна прецизност да се датираат во точниот период на распнувањето.

Иако ископувањата не даваат конечен одговор на прашањето каде се наоѓа гробот на Исус, тие потврдуваат дека местото што христијаните го почитуваат со векови има географски и археолошки карактеристики кои се совпаѓаат со описите од Новиот завет.