Полскиот премиер Доналд Туск со потсмев реагираше на извештајот во кој се наведува дека администрацијата на Доналд Трамп го гледа поранешниот унгарски премиер Виктор Орбан како кандидат за генерален секретар на Обединетите нации.

Според извештајот на The Wall Street Journal, Соединетите Држави го охрабриле Орбан да влезе во трката за оваа функција. Весникот сугерира дека Орбан би можел да послужи како компромисен кандидат, кој потенцијално би можел да добие поддршка од Москва, Вашингтон и Пекинг.

Кога беше прашан за извештајот на WSJ, Туск се насмевна и забележа дека нема слушнато за таква можност.

„Не толку одамна, тој наводно беше кандидат за претседател на Европската комисија. Ова ми изгледа исто толку смешно како и онаа претходна гласина“, рече Туск, осврнувајќи се на едно претходно, неосновано тврдење дека Орбан би можел да стане претседател на Европската комисија.

Брисел го поздрави заминувањето на Орбан

Орбан, долгогодишниот националистички премиер на Унгарија, доживеа тежок пораз на априлските избори, на кои победи партијата од десниот центар „Тиса“, предводена од Петер Маѓар.

Тој беше еден од најблиските политички сојузници на Доналд Трамп во рамките на Европската унија. Американскиот претседател го опиша како „вистински пријател“ и јавно му даде поддршка, додека американскиот потпретседател Џеј Ди Венс дури и отпатува во Унгарија за да учествува во неговата изборна кампања. Во Брисел, пак, заминувањето на Орбан од власт беше дочекано со ентузијазам.