Кон крајот на 2023 година, на една пацијентка ѝ бил отстранет целиот желудник поради погрешна дијагноза на рак; подоцна се испоставило дека таа всушност имала бениген тумор, за кој не била потребна таква операција. Општинското државно обвинителство во Загреб поднесе обвинение против лекарката од КБЦ „Сестре милосрднице“, која ја поставила дијагнозата.

За време на операцијата во КБЦ Загреб, покрај желудникот, на пациентката ѝ биле отстранети и лимфните јазли, оментумот, слепото црево и жолчното ќесе. Обвинителството тврди дека лекарката погрешно го протолкувала резултатот од биопсијата како аденокарцином, додека всушност станувало збор за бениген невроендокриен тумор.

Според обвинението, лекарката не спровела дополнителни испитувања со кои би можела да се утврди точната дијагноза. Таа се товари за несовесно лекување што резултирало со особено тешка телесна повреда, а обвинителството бара казна затвор во траење од една година.

Пациентка: Имам 100% телесно оштетување

Пациентката раскажа дека по операцијата трпела неподносливи болки и дека дури по дополнителната анализа на отстранетиот желудник било откриено оти таа немала рак. „Имав 80% инвалидитет, а сега имам 100% телесно оштетување“, изјави таа, додавајќи дека и внатрешната болничка ревизија утврдила стручен пропуст при нејзиното лекување. Обвинетата лекарка ја негира одговорноста, тврдејќи дека биле спроведени дополнителни испитувања и дека други лекари, пред операцијата, требало да потврдат дали дијагностичката постапка е целосна. Хирургот што ја извршил операцијата потврди дека за време на зафатот не можел да напипа тумор, но сепак продолжил со интервенцијата врз основа на наодите што укажувале на рак.

Судските вештаци од областа на медицината утврдиле стручен пропуст во дијагностичкиот процес, како и тешки и трајни последици кои настанале како резултат на операцијата. Пациентката моментално страда од гадење, повраќање, дијареја, значително губење на тежината и психолошки проблеми, вклучително и посттрауматско стресно растројство.