За Македонија е наведена потрошувачка од приближно 1,6 милиони долари. Периодот опфатен со анализата е од декември 2024 до ноември 2025 година, односно финансиска година, а не календарската 2025 година.

Хрватска води во регионот

Во споредбата на шесте земји од регионот, Македонија е пред Црна Гора, за која се проценува потрошувачка од околу 700.000 долари.

Највисок износ има Хрватска, со 11,6 милиони долари, по што следуваат Словенија со 10,3 милиони и Србија со 8,9 милиони долари. За Босна и Херцеговина проценката изнесува 2,7 милиони долари. Вкупно, за шесте пазари се наведуваат повеќе од 35 милиони долари за една година. Овие износи ја прикажуваат вкупната проценета потрошувачка, а не трошењето по корисник или по жител. 

Како се пресметува потрошувачката?

Проектот „JuicyInsights“, зад кој стои пребарувачот „JuicySearch“, ги користи ревидираните финансиски извештаи на компанијата како основа за глобалните и регионалните износи. Распределбата по држави, меѓутоа, се моделира со дополнителни показатели, меѓу кои интересот во интернет-пребарувањата, нивото на приходи и достапноста на платформата и картичните плаќања.

Тоа значи дека бројката за Македонија не е добиена со собирање на поединечните трансакции на домашните корисници. Ниту, пак, интересот во пребарувањата може директно да се изедначи со бројот на луѓе што плаќаат за содржините.

Според истата анализа, глобалната потрошувачка на „OnlyFans“ во опфатениот период достигнала 7,84 милијарди долари, што претставува раст од 8,7 отсто во однос на претходната финансиска година. 

Платформата функционира преку претплати и дополнителни плаќања за содржини од авторите. Иако најчесто се поврзува со материјали за возрасни, на неа се објавуваат и други видови содржини.

Оттука, проценетите 1,4 милиони евра даваат увид во можниот обем на македонскиот пазар, но не откриваат колку домашни корисници плаќаат, колку троши секој од нив или за каква содржина ги издвојуваат парите.