Германски суд пресуди дека Google не смее да објавува сателитски снимки од приватни имоти без согласност од сопствениците. Овој случај е резултат на тужба од сопственик на куќа во Франкфурт поради објавување на снимки од неговиот дом на Google Maps и Google Earth.
Фотографии од станбени објекти во Германија не смеат да се објавуваат на Google Earth и Google Maps доколку сопствениците се спротивстават на тоа, одлучи германски суд. Одлуката доаѓа откако сопственик на куќа во Франкфурт го тужеше Google поради користење сателитски снимки од неговиот имот. Претходно, истиот сопственик успеа да издејствува заматување на фотографиите од предниот дел на неговата куќа на сервисите Google Street View и Apple Look Around.
Сега, тој покрена постапка и во врска со снимките од воздух на Google Earth и Google Maps. Регионалниот суд во Франкфурт повторно пресуди во негова корист, утврдувајќи дека користењето на такви снимки без негова согласност е незаконско.
„Никој не треба да биде принуден да прифати јавно дистрибуирање на снимки од воздух од неговиот имот ширум светот без негова согласност, особено кога фотографиите прикажуваат делови од имотот што не се видливи за јавноста“, се наведува во соопштението на судот.
Во овој случај, снимките на Google Earth и Google Maps го прикажуваа и задниот дел од куќата, кој минувачите не можат да го видат од улицата.
Судот го обвини Google дека дошол до снимките преку шпионирање, со образложение дека сопствениците на имотите не биле однапред известени оти сателити ќе снимаат делови од нивните домови.
Следствено, тие немале можност навреме да ги сокријат деловите од својот имот што не сакале да бидат јавно достапни. Судиите дополнително заклучија дека Google не може да ги оправда ваквите постапки повикувајќи се на правото на корисниците на интернет да пристапуваат до информации.
