„BMW“ на 30 септември во Европа, односно вечерта на 29 септември по американско време, ќе ја претстави целосно новата Серија 3 со класични мотори.

По електричниот „i3“, ова ќе биде вториот модел кој го презема новиот дизајнерски правец „Neue Klasse“.

Новата Серија 3 ќе изгледа значително поинаку од актуелната генерација.

„BMW“ се откажува од предимензионираните бубрежести маски и преминува на потенки и пошироки отвори кои визуелно се надоврзуваат на предните светла.

Фаровите ќе имаат по две дијагонални светлосни линии за дневните светла, слично како кај новиот „i3“.

И задниот дел ќе биде инспириран од електричниот модел, со слични „LED“ светла, капак на багажникот и дифузор.

Сепак, Серија 3 со мотор со внатрешно согорување ќе има подолг преден дел од електричниот модел, поголем заден надвис и покласично ветробранско стакло.

Целосно нова кабина

Внатрешноста носи голема промена. Новата Серија 3 ќе го добие системот „BMW Panoramic iDrive“ и закосениот централен екран, по примерот на моделите „iX3“, „i3“ и новата генерација на „X5“.

За разлика од електричниот „i3“, новата Серија 3 нема да ја користи механичката платформа „Neue Klasse“. Наместо неа, „BMW“ ќе примени унапредена верзија на постојната архитектура „CLAR“.

„M350 xDrive“ со 443 КС

„BMW“ веќе го најави и „M350 xDrive“, кој ќе го замени актуелниот „M340i xDrive“. Ќе го придвижува 3,0-литарски турбобензински шестцилиндричен мотор со 48-волтен благ хибриден систем.

Ќе развива 443 КС и 580 Nm, со осумстепен автоматски менувач и погон на сите четири тркала. Системот ќе има и режим со погон само на задните тркала, наречен „Drift Moment“.

Новите генерации на „M3“ и „M4“ исто така се во план, но нивното пристигнување се очекува дури во 2028, односно 2030 година.

Испораките на новата Серија 3 до купувачите би требало да започнат во текот на 2027 година.