Актерката Сузан Сарандон била приведена за време на пропалестински протест одржан вчера во Њујорк, во близина на седиштето на Обединетите нации. Оскаровката била меѓу бројните демонстранти кои се собрале по повод обраќањето на израелскиот премиер Бенјамин Нетанјаху на Генералното собрание на ОН.
На снимките што се појавија на социјалните мрежи се гледа 79-годишната актерка додека полицајците ја одведуваат од местото на протестот. Сарандон со години јавно е ангажирана во врска со палестинското прашање, а поради нејзините претходни изјави, според нејзините сопствени тврдења, се соочила и со професионални последици, пишува „Variety“.
Протестот го организирала групата „Jewish Voice for Peace“, а дел од присутните го блокирале сообраќајот, по што интервенирала њујоршката полиција. Според извештаите на американските медиуми, биле приведени околу сто лица.
Меѓу приведените и други познати имиња
Сарандон не била единствената позната личност која учествувала на протестот. Меѓу приведените била и ѕвездата на серијата „Hacks“, Хана Ајнбиндер, а на протестот учествувал и комичарот Калеб Хирон, како и некои њујоршки политичари.
На социјалните мрежи се проширија и снимки од Ајнбиндер додека полицајците ја одведуваат. Притоа, актерката извикувала „Ослободете ја Палестина“ и му порачала на Нетанјаху да го напушти Њујорк.
Ајнбиндер веќе подолго време јавно зборува за Палестина. Особено внимание привлече минатата година кога, при примањето на наградата „Еми“ за најдобра споредна актерка во хумористична серија за улогата во „Hacks“, својот говор го заврши со порака за поддршка на Палестина. На оваа тема продолжи да зборува и во текот на оваа година, истакнувајќи дека можните професионални последици нема да ја спречат јавно да ги изнесува своите ставови.
Сарандон и порано зборувала за последиците од нејзините ставови
Сузан Сарандон веќе со години учествува на протести и јавно ги изнесува своите ставови за израелско-палестинскиот конфликт. Особено внимание привлече во 2023 година, кога по нејзиното учество на пропалестински собир, агенцијата „United Talent Agency“ ја прекина соработката со неа.
Актерката во меѓувреме тврдела дека последиците продолжиле да се чувствуваат и врз нејзината кариера, како и дека поради нејзините јавни настапи останала без одредени деловни можности.
Токму Сарандон претходно ја споменувала и Ајнбиндер кога зборувала за познати личности кои јавно ги поддржуваат Палестинците и покрај можните последици за нивните кариери.
Нивното приведување се случи во време на зголемено внимание од јавноста поради престојот на Нетанјаху во Њујорк и неговото обраќање пред Генералното собрание на Обединетите нации. Според првите достапни информации, не биле објавени детали за евентуалните обвиненија против Сарандон и останатите приведени.
