ДОМ поставува прашања до Владата за изградбата на Националниот дата-центар, барајќи појаснувања за енергетската и водната потрошувачка, како и заштитата на податоците, во услови кога дигиталната инфраструктура не треба да ги загрозува ресурсите и приватноста на граѓаните.
Владата ја посочи локацијата кај Бунарџик за изградба на Националниот дата-центар со инвестиција од 20 милиони евра, истакнувајќи ја близината до ТИРЗ Скопје 1 и 2, автопатот, оптичката мрежа и можноста за фотоволтаична централа.
Но, изборот на локација не е единствениот чекор. Клучното прашање поставено од ДОМ е: дали државата има Национална стратегија што го регулира вкупниот капацитет на дата-центрите?
ДОМ смета дека за сите дата-центри во државата не смее да се алоцираат повеќе од 5% од вкупната произведена електрична енергија и увезениот гас, бидејќи тоа може да води до:
• Притисок врз цените:ангажирањето преголема моќност – дури и кога енергијата се набавува на слободниот пазар – може да создаде дополнителен притисок врз цените, што на крајот ќе се одрази врз крајните потрошувачи и стопанството.
• Нестратешко трошење ресурси:неприфатливо и стратешки погрешно би било, ако 50% од увозот на природен гас да се користи во гасна централа наменета за потребите на дата-центар.
За Националниот дата-центар, партијата бара од Владата итно да одговори:
1. Енергетска моќност и извори:со колкава инсталирана моќност ќе располага дата-центарот и како ќе се обезбедуваат основното и алтернативното напојување? Колкав реален процент од потребите ќе покрива алтернативното напојување, а колкав најавената фотоволтаична централа?
2. Влијание врз енергијата, водата и бучавата:каков систем за ладење ќе се користи, колку вода и енергија ќе троши и како конкретно ќе се реши прашањето со бучавата?
3. Инфраструктурни трошоци:какви дополнителни инвестиции се потребни во електроенергетската мрежа и кој ќе ги покрие тие трошоци?
4. Заштита на податоците:ако во Националниот дата-центар ќе се мигрираат податоци од различни државни институции, кои категории податоци ќе бидат опфатени, кој ќе има пристап до нив и како ќе се обезбедат нивната приватност и заштита од неовластен пристап или злоупотреба?
Според нив, развојот на дигиталната инфраструктура е потребен, но тој не смее да се одвива на штета на енергетската стабилност, јавните средства и заштитата на податоците на граѓаните.
