Како знак на благодарност за долгогодишната успешна соработка и за одговорниот пристап кон селекцијата на отпадот од пакување, Пакомак донираше ново рекреативно игралиште со справи за вежбање за жителите на Општина Сопиште.
Донацијата е реализирана како признание за високата покриеност на општината со жолти канти за селекција на отпад од пакување, која достигнува речиси 80 проценти. Со ова, Општина Сопиште се издвојува како позитивен пример за локална заедница која активно придонесува кон заштитата на животната средина и кон развојот на одржливи еко навики кај граѓаните.
Новото игралиште е опремено со справи за вежбање наменети за возрасни, произведени од данскиот производител COMPAN, компанија позната по квалитетот, безбедноста и долготрајноста на своите производи. Дел од производството на COMPAN вклучува употреба на рециклирани материјали, што дополнително ја нагласува еколошката вредност на оваа донација.
Вкупната вредност на донацијата изнесува околу 400.000 денари, а целта е да се збогати јавниот простор во општината и да се поттикнат здрави животни навики, рекреација и поголема активност на граѓаните на отворено.
„Оваа донација е пример како добрата соработка меѓу локалните самоуправи, граѓаните и компаниите може да создаде видливи и корисни резултати за заедницата. Сопиште покажува дека селекцијата на отпадот не е само еколошка обврска, туку и можност за создавање подобри услови за живот“, изјавија од Пакомак.
Од Општина Сопиште ја поздравуваат иницијативата и истакнуваат дека ваквите проекти имаат значајна улога во подобрувањето на јавните површини и квалитетот на живот на граѓаните.
Пакомак продолжува со поддршка на локалните заедници кои покажуваат посветеност кон селекција, рециклирање и одговорно управување со отпадот од пакување. Преку вакви активности, компанијата ја потврдува својата мисија за создавање почиста животна средина и поодржлива иднина.
