Цените на гасот во Европа растат, а Франција се подготвува за зимата со зголемување на залихите. Оптимизмот околу доставените залихи и предизвиците со снабдувањето ја прават оваа тема особено важна за потрошувачите и енергетската стабилност на регионот.
Складовите за гас во Франција се полни за 71 процент, а се очекува земјата да има доволно зали за претстојната зимска сезона, изјави денес претседателката на Француската комисија за регулирање на енергијата (CRE) Емануела Варгон.
Според неа, моменталните податоци се „релативно охрабрувачки“, а целта е зафатеноста на складиштата во Франција да достигне 85 проценти пред почетокот на сезоната, пренесува „Фигаро“.
Варгон додаде дека е „прилично уверена“ дека ова ниво ќе се достигне, со што ќе се намали ризикот од недостиг и прекини во снабдувањето на домаќинствата.
Референтната цена на гасот на европскиот пазар, холандската TTF, достигна 74,14 евра за MWh, највисоко ниво за повеќе од три години, во споредба со околу 30 евра пред почетокот на новите конфликти на Блискиот Исток, што веројатно ќе влијае и на потрошувачите.
Дополнителен притисок претставува планираното постепено укинување на рускиот течен природен гас во Европа од 1 јануари 2027 година, поради што конкуренцијата за преостанатите извори на снабдување би можела дополнително да се зголеми, пренесува Танјуг.
Варгон предупреди дека Франција е целосно зависна од меѓународните пазари кога станува збор за гас.
Од 1 септември, референтната цена на гасот за француските домаќинства се зголеми за 5,6 проценти, од 162,89 на 172,05 евра за мегават-час (MWh), вклучувајќи го и данокот.
Промената влијае на околу шест милиони домаќинства чии тарифи се поврзани со оваа цена.
