Пакетот е базиран на моделот „IS 350 F SPORT“, а премиерно беше прикажан во Мајами, на последната станица од турнејата со која „Lexus“ одбележува 25 години од моделот „IS“, наведува „Motor1“.

Нова зелена боја и „BBS“ фелни

Најголемата визуелна промена е новата зелена боја на каросеријата „Envious“, која досега не била достапна на ниту еден модел на „Lexus“, во комбинација со црни ковани алуминиумски „BBS“ фелни од 19 инчи.

Во кабината се наоѓаат црни „NuLuxe“ седишта со „Ultrasuede“ влошки, зелени шевови и детали со завршна обработка во боја на сатенски хром.

V6 мотор со 311 коњски сили

Под хаубата нема промени, па „IS 350 F SPORT“ го придвижува атмосферски 3,5-литарски V6 мотор со 311 КС и 380 Nm вртежен момент, додека верзијата со погон на задните тркала користи осумстепен автоматски менувач, а моделот со погон на сите четири тркала шестстепен автоматик.

Специјалното издание стандардно го добива пакетот „Handling Package“ со спортски подесена адаптивна суспензија и различни режими на возење, како и „Torsen“ диференцијал со ограничено пролизгување кај верзијата со погон на задните тркала.

Само 350 примероци

На листата на стандардна опрема се наоѓа и „Technology Package“ со системите „Traffic Jam Assist“, „Lane Change Assist“ и „Front Cross-Traffic Alert“, тројни LED предни светла, панорамски приказ на околината на возилото, електричен покривен отвор и „Mark Levinson“ аудиосистем.

„Lexus“ планира новиот „IS Special Appearance Package“ да пристигне во продажните салони до крајот на 2026 година, додека цената и комплетните спецификации на ограничената серија сè уште не се објавени.