На мобилните телефони со копчиња им се ближи неизбежниот крај: до крајот на 2028 година овие едноставни уреди, кои ги претпочитаат многу повозрасни граѓани, како и приврзаниците на „дигиталниот детокс“, ќе станат неупотребливи во Германија. Причината е гасењето на „2G“ технологијата, на која се потпираат повеќето од овие телефони, наведува „Giga.de“.
Што значи гасењето на „2G“ мрежата?
„2G“ мрежите, познати и како „GSM“, се користат повеќе од три децении и претставуваа основа на мобилните комуникации на почетокот на деведесеттите години. Дури и по воведувањето на „3G“ и „4G“ стандардите, „2G“ продолжи да се користи за телефонски повици и СМС-пораки, како и за голем број уреди, меѓу кои терминали за плаќање со картички, алармни системи, системи за итни случаи во автомобилите и индустриски сензори.
Сепак, мобилните оператори во Германија веќе ги објавија роковите за гасење на „2G“ мрежата: „Telekom“ ќе ја укине оваа услуга на крајот на јуни 2028 година, „Vodafone“ на крајот на септември 2028 година, а „Telefónica (O2)“ најдоцна во декември 2028 година.
Што ќе се случи со уредите што користат „2G“?
По гасењето на „2G“ мрежата, сите уреди што се потпираат исклучиво на овој стандард ќе станат целосно неупотребливи за мрежни услуги. Мобилните телефони со копчиња кои не поддржуваат „4G“ ќе можат да се користат само за активности за кои не е потребна мобилна мрежа, како игри или други функции што работат без интернет-врска. Покрај тоа, постарите алармни системи, паметните броила, терминалите за плаќање и другите слични уреди ќе мора да бидат заменети или модернизирани.
Според пишувањето на порталот „Giga.de“, дури и одредени понови паметни телефони кои ја користат „2G“ технологијата за гласовни повици би можеле да имаат проблеми, особено доколку не ја поддржуваат услугата „Voice over LTE (VoLTE)“. Сопствениците на таквите уреди ќе мора да ги заменат доколку сакаат и понатаму да можат да остваруваат телефонски повици.
Какви алтернативи постојат за корисниците на телефони со копчиња?
На корисниците на телефони со копчиња, како и на операторите на „IoT (Internet of Things)“ уреди, им се препорачува навреме да започнат со преминување на понови технологии. На пазарот веќе постојат едноставни мобилни телефони кои го поддржуваат „4G“ стандардот, што овозможува лесна транзиција за корисниците кои и понатаму претпочитаат едноставни уреди.
Иако телефоните со копчиња долги години беа сигурно и практично решение, нивните корисници ќе мора да се подготват за промените. Со гасењето на „2G“ мрежата, преминувањето кон понови технологии ќе стане неизбежно.
