Германскиот канцелар Фридрих Мерц најави дека ќе се открие кој стои зад обидот за напад со дрон на аеродромот во Лајпциг, истакнувајќи дека одговорните ќе сносат сериозни последици. Инцидентот укажува на растечките хибридни закани кон Германија, а се сомнева дека Русија е вмешана зад нападот.
Федералната влада наскоро ќе открие кој стои зад обидот за напад со дрон на аеродромот во Лајпциг, објави германскиот канцелар Фридрих Мерц и рече дека одговорните „ќе платат за тоа“.
„Обидот за напад на 4 август покажува дека Германија е сè повеќе цел на хибридни закани“, додаде канцеларот.
Мерц, денеска, пред состанокот на кабинетот во Нојхарденберг, рече дека владата наскоро ќе презентира информации за обидот за напад со дрон во Лајпциг. „Ќе платат за тоа“, рече Мерц, но додаде дека Нојхарденберг не е местото за откривање на деталите од истрагата.
Според него, инцидентот во Лајпциг покажува дека хибридните напади врз Германија стануваат сè почести.
„Напаѓачите станаа целосно неодговорни и свесно ризикуваат голема материјална штета, па дури и повреди или смрт“, рече Мерц.
Тој истакна дека федералната влада се подготвува за вакви закани, првенствено со основање на Центарот за дронови во Магдебург. Тој го спомена одвраќањето како друга мерка.
„Германија испраќа јасна порака – оние што стојат зад хибридните напади ќе сносат сериозни последици“, рече тој.
Во Лајпциг, беспилотно летало со експлозив беше насочено кон украински товарен авион. Според информациите на безбедносните служби, најверојатно напаѓачите користеле три дронови. Поради помошта на Германија за Украина, се сомнева дека Русија стои зад нападот.
