Хрватското крајбрежје уште еднаш ja привлече светската елита. Јан Кум, коосновачот на „WhatsApp“, чие богатство се проценува на 17 милијарди долари, ја закотви својата суперјахта „Moonrise“ кај Мљет, а истиот ден му пристигна и посебен гостин: Џеф Безос, сопственикот на „Amazon“, во друштво на американскиот медиумски магнат Бери Дилер.

Луксуз на Јадранот

Кум на „Moonrise“ пристигна со хеликоптер во понеделникот, а Безос го посети во доцните попладневни часови. Така, тројцата милијардери, Кум, Безос и Дилер, се најдоа на ист пловен објект среде Јадранот, далеку од камерите и јавноста.

Кум не е странец на хрватското крајбрежје, бидејќи и порано одморал во Хрватска. Неговата суперјахта „Moonrise“ беше снимена меѓу островите Лопуд и Шипан уште во 2021 и во 2024 година, а забележано е и дека во една прилика на летување во Хрватска пристигнал дури со три пловила: покрај „Moonrise“, го придружувале и 74 метри долгата јахта „Mogambo“ и 55 метри долгата „Power Play“, која му служела како хелиодром.

Ниту Безос не е непознат на овие простори. Сопственикот на „Amazon“ редовно летува на Медитеранот на својата суперјахта „Koru“, а крстарел по Јадранот во летото 2023 и 2025 година, при што се забележани неговите престои на Хвар, Мљет, Корчула, како и посетата на шибенскиот архипелаг.

„Moonrise“: 200 милиони евра луксуз

Јахтата „Moonrise“ не е само обично пловило. Станува збор за 100-метарска суперјахта на холандската бродоградителска компанија „Feadship“, изградена во 2020 година. Нејзиниот софистициран надворешен дизајн е дело на Де Фогт, додека ентериерот е дело на францускиот дизајнер Реми Тесје. На бродот може да престојуваат 16 гости и 32 членови на екипажот, а неговата цена изнесува речиси 200 милиони евра.