ВЛЕН ја осудува институционалната неодговорност по трагедијата во модуларната болница во Тетово која однесе 14 животи и најавува дека ќе продолжи да бара независна истрага и одговорност.
Свесното жртвување на обвинението за трагедијата во модуларната болница во Тетово претставува повторно жртвување на 14-те настрадани, на нивното достоинство и на болката на нивните најблиски, велат од ВЛЕН.
„Али Ахмети и обвинителството раководено од Ислам Абази должат одговор пред јавноста: како е можно по 14 изгубени животи на крајот да излезе дека „виновен“ е кабелот? Овој случај ризикува да остане запаметен како еден од најсрамните примери за институционална неодговорност и заробено правосудство. Правдата не смее да зависи од ничие политичко влијание, партиска припадност или функција. Кога за трагедија со 14 човечки жртви нема целосна и неселективна одговорност, тогаш не станува збор само за неуспех на едно обвинение, туку за тежок пораз на целиот правосуден систем“, се наведува во соопштението.
Овој скандалозен правосуден епилог, велат од ВЛЕН, оди на товар на нереформираното раководство на ДУИ.
„Тоа раководство уште еднаш покажува дека Албанците во Македонија ги користи како совршено алиби за својата опсесија со власта – власт која за нив значи привилегии, тендери и фотелји, а не одговорност пред граѓаните. За ДУИ, очигледно, човечките животи се само статистика. Без душа, без морал и без емпатија. Но за семејствата на жртвите тие се незаменливи човечки животи, а за целото општество – обврска вистината да биде откриена и правдата целосно задоволена. ВЛЕН нема да дозволи трагедијата во Тетово да биде заборавена, ниту одговорноста да биде закопана во обвинителски и судски лавиринти. Ќе продолжиме да бараме независна истрага, неселективна одговорност и правда за секој од 14-те изгубени животи. Политичката казна за ваквото ненародно и неодговорно однесување ќе стигне на следните парламентарни избори, кога и да се одржат. Албанците доаѓаат по својата правда“, велат од ВЛЕН.
