Иако не станува збор за криминалистичка истрага, полицијата се обидува да го реконструира неговиот живот со надеж дека некој ќе го препознае.
Неидентификуван маж повеќе од три години не може да им каже на лекарите кој е, откако се урнал на улица во Амстердам. Мажот бил пронајден на 10 мај 2023 година и итно пренесен во болница, каде што лекарите се посомневале на мозочен удар или крвавење во мозокот. Кај него била потврдена афазија, состојба која ја нарушува способноста за говор, како и разбирањето на говорниот и пишаниот јазик. Кај себе немал ниту банкарски картички ниту лични документи, па медицинскиот персонал не можел да го утврди ниту неговото име ниту потеклото. Повеќе од три години подоцна, истражителите и натаму се обидуваат да ја решат мистеријата за неговиот идентитет, соопшти полицијата. Една од најсилните траги укажува на можни врски со Канада.
Вработените во кафулето „Soupenzo“ на Ватерлоплејн го препознале како „Крис Канаѓанецот“. Често доаѓал со куфер, нарачувал посебни варијанти на супа и секогаш имал пари. Се зборувало дека зборува англиски со американски или канадски акцент. Во будистичката заедница на Миденвег го познавале како „Лаки“. На јавниот плоштад и во околните продавници го нарекувале со различни имиња: Лаки, Луис, Ли, Џон, Понитејл и Сони. Постојат приказни дека бил исклучително богат, а според други, талкал по улиците на Амстердам. Се претпоставува дека престојувал и во Северна Америка и во Непал, но никој не знае колку долго живеел во Амстердам.
Случајот го презеле двајца пензионирани полицајци. Иако не станува збор за криминалистичка истрага, тие се обидуваат да го реконструираат неговиот живот со надеж дека некој ќе го препознае.
ДНК базите и технологијата за препознавање лица не дале резултати, додека строгите правила за приватност го оневозможуваат пристапот до поголеми бази на податоци. Мажот сега престојува во установа каде што поголемиот дел од денот го минува во кревет. Експертите утврдиле дека нема способност самостојно да донесува одлуки. Полицијата во Амстердам ги повикува сите кои можеби знаат кој е овој маж да се јават.
