Филмскиот продуцент Никола Алтмајер и неговата партнерка Матилд Фавије, која долги години била директорка за односи со јавноста во култната модна куќа „Диор“, загинаа во тешка сообраќајна несреќа денеска попладне во францускиот департман Де-Севр.
Како што соопшти обвинителството во Ниор, сообраќајната несреќа се случила околу 16 часот на пат во близина на местото Ерво. Автомобилот во кој се наоѓале Алтмајер и Фавије се судрил со тешко товарно возило што доаѓало од спротивната насока. До несреќата дошло во моментот кога нивниот автомобил претекнувал друго возило, пишува „Variety“.
Француските власти отворија истрага за ненамерно предизвикување смрт во сообраќајот. Целта е да се утврди како точно дошло до кобниот судир и што се случувало непосредно пред трагедијата.
Матилд Фавије, која имала 57 години, била добро познато име во светот на модата и изградила долгогодишна кариера на светската модна сцена. Пред пристигнувањето во „Диор“, работела во „Прада“, каде што била задолжена за развивање на односите на модната куќа со француските медиуми.
На „Диор“ му се придружила во 2011 година, по што станала една од клучните личности задолжени за комуникација со светските ѕвезди кои соработувале со престижниот бренд.
Во текот на кариерата работела со бројни големи имиња од светот на филмот, музиката и популарната култура, меѓу кои Натали Портман, Ријана, Џенифер Лоренс, Ања Тејлор-Џој и други.
Француските медиуми ја опишувале како личност со големо влијание во модната индустрија, но и како некој кој со својот карактер оставил силен впечаток кај соработниците. Во 2024 година ја објавила книгата „Mathilde à Paris“, во која го претставила своето доживување на Париз.
Била активна и надвор од модната индустрија. Го основала здружението „Esthétique & Cancer“, чија цел е да им обезбеди поддршка на луѓето кои боледуваат од рак.
Алтмајер зад себе оставил четири деца, додека Фавије имала две деца. Нивната ненадејна смрт потресе две индустрии во кои низ годините изградиле исклучително силно професионално и лично влијание.
Никола имал 61 година и со децении бил едно од значајните имиња во француската независна филмска продукција. Заедно со својот брат Ерик ја водел продукциската компанија „Mandarin & Compagnie“, која стои зад голем број успешни остварувања.
Неговиот продуцентски потпис, меѓу другото, се поврзува со популарниот серијал „OSS 117“, филмот „Brice de Nice“, но и со многу други проекти.
Соработувал со истакнати режисери како Мишел Азанависиус, Франсоа Озон и Бертран Бонело, а меѓу неговите остварувања се филмовите „Млада и убава“, „Новата девојка“, „Франц“, „По Божја милост“, „Лето 85“ и „Сè помина добро“.
Алтмајер учествувал и во продукцијата на филмот „Saint Laurent“, додека меѓу неговите понови проекти бил и „Monsieur Aznavour“, биографска приказна за славниот француски пејач Шарл Азнавур. За придонесот кон француската кинематографија, тој и неговиот брат пред девет години ја добиле наградата „Daniel Toscan du Plantier“.
