Американскиот претседател Доналд Трамп соопшти дека планираните нови воени напади врз Иран се ставени во мирување поради дипломатски напредок во преговорите за договор кој би имал значајни последици по регионалната стабилност.
Американскиот претседател Доналд Трамп соопшти дека планираниот нов бран воени напади врз Иран е ставен во мирување поради, како што наведе, напредок во насока на постигнување дипломатски договор.
Во објава на платформата „Truth Social“, Трамп изјави дека прекинот на нападите е условен со брзо постигнување договор. Тој посочи дека американските сили биле подготвени да извршат напади „со полна сила“, но дека Иран и други земји од регионот побарале Вашингтон да се воздржи бидејќи биле договорени рамките на можен договор.
Според Трамп, договорот би предвидувал целосно повторно отворање на Ормутскиот Теснец и спречување на, како што го нарече, иранскиот нуклеарен ризик. Тој додаде дека и Израел би го почитувал договорот.
Трамп не објави детали за наводниот дипломатски напредок, а Иран и другите земји вклучени во разговорите сè уште не го коментираа неговото тврдење.
Претходно, Техеран предупреди дека ќе одговори со напади врз критична инфраструктура во Израел и земјите од Заливот доколку САД извршат нови удари врз ирански цели. Според медиумските информации, потенцијални цели на американските напади би можеле да бидат ирански енергетски објекти.
Иранскиот министер за надворешни работи Абас Арагчи порача дека вооружените сили на земјата ќе одговорат на секој нов напад, додека Саудиска Арабија, според американски медиуми, побарала од Трамп деескалација на тензиите.
