Пристигнува војската како засилување

Како одговор на невидениот прилив на луѓе, шпанското Министерство за внатрешни работи најави итно испраќање на 60 припадници на вооружените сили и уште 30 припадници на Цивилната гарда, со цел да помогнат во одржувањето на безбедноста. Сепак, и покрај очајничките апели на регионалната власт во Сеута, централната влада во Мадрид одби да прогласи вонредна состојба.

Според министерството, таква мерка според законот не може да се воведе поради миграциски прашања, туку исклучиво во случаи на метеоролошки, вулкански или нуклеарни катастрофи.

Официјалните лица на теренот се затечени од размерите на случувањата. Рашид Сбихи, претседател на здружението што ги претставува припадниците на Цивилната гарда во Сеута, изјави дека владее „апсолутен хаос“ и дека граничниот систем е „целосно колабиран“.

За лично да се увери во размерите на кризата, шпанскиот премиер Педро Санчез најави посета на Сеута во петок, заедно со министерот за внатрешни работи Фернандо Гранде-Марласка.

Остри политички поделби и „невообичаени околности“ на границата

Оваа криза длабоко ја потресе политичката сцена во Шпанија. Лидерот на конзервативната опозиција, Алберто Нуњез Феихо, ја повика владата да не го игнорира она што тој го нарече „криза на националната безбедност“. Неговиот колега од крајната десница, Сантијаго Абаскал од „Vox“, отиде чекор понатаму, нарекувајќи го масовното пристигнување на луѓе „инвазија“ и обвинувајќи ја владата на Санчез дека самата го охрабрила овој бран за да остане на власт.

Од Мароко пристигнуваат спротивставени пораки. Додека официјални владини извори вината ја префрлаат врз „криминални организации“ и ја фалат „примерната“ соработка со Шпанија, Ашраф Маимуни од Мароканското здружение за човекови права тврди дека преминот Тарахал бил отворен во четвртокот наутро под „невообичаени околности“.

„Суспендирајте ја Шпанија од Шенген“

Италијанскиот министер за надворешни работи Антонио Тајани во четвртокот изјави дека сака суспензија на Шпанија од Шенген-зоната, откако стотици мигранти нелегално пристигнале во шпанската енклава Сеута од Мароко.

Поради кризата во Сеута се огласи и италијанската премиерка Џорџа Мелони, која истакна дека сцените се впечатливи и уште еднаш покажуваат дека „неконтролираната нелегална имиграција претставува конкретна закана за безбедноста на европските граници.“

„Разговарав со министерот за внатрешни работи Матео Пјантедози. Италија нема да седи со скрстени раце. Ги свикуваме надлежните институции и, по овие состаноци, подготвени сме да интервенираме со вонредни мерки за да ги одбраниме границите и безбедноста на граѓаните, вклучително и суспензија на Шенгенскиот простор со Шпанија“, напиша таа на мрежата „X“.

„Кога станува збор за нелегалната имиграција, нема да отстапиме ниту чекор: одбраната на границите, запирањето на шверцерите на луѓе и обезбедувањето ефикасна репатријација ќе останат курсот на оваа Влада“, додаде Мелони.

Како дојде до општиот хаос?

Да потсетиме, драматичните сцени го обиколуваат светот уште од четвртокот, кога илјадници, претежно млади мажи, но и семејства со деца, масовно тргнаа од Мароко кон Европа. Според податоците на шпанската државна телевизија „TVE“, границата ја преминале меѓу 2.000 и 3.000 луѓе за само неколку часа.

Многумина од нив го заобиколувале градскиот бранобран, пливајќи со помош на автомобилски гуми и други пловечки помагала, додека помал дел ги прескокнале високите гранични огради. На објавените снимки се гледаат мигранти кои еуфорично трчаат по плажите на Сеута, извикувајќи: „Да живее Шпанија!“

Бранот на нерегуларни пристигнувања дополнително се засили по неодамнешната пресуда на шпанскиот Врховен суд. Со таа пресуда е наложено мигрантите пресретнати на море, во близина на Сеута и Мелилја, повеќе да не можат автоматски да бидат враќани во Мароко.

Активистите за правата на мигрантите, како што е Закарија Зароки, ја споредуваат сегашната ескалација со мај 2021 година, кога за само неколку дена во енклавата успеале да влезат повеќе од 10.000 луѓе.