Извршниот директор на американската компанија „Palantir“, Алекс Карп, ја предупреди американската администрација дека прекумерното регулирање на вештачката интелигенција би можело да го забави технолошкиот развој на САД во глобалниот натпревар со Кина, при што Европа ја посочи како негативен пример.
„Имаме пример за она што не функционира. Се вика Европа“, изјави Карп, тврдејќи дека европската регулаторна рамка го отежнува развојот на технолошките компании и негативно влијае врз нивната конкурентност, пренесува „Fox Business“.
Според неговите зборови, револуцијата во областа на вештачката интелигенција веќе започна и „не може повторно да се врати во кутијата“.
Како најголема пречка за пошироката примена на вештачката интелигенција, Карп не го наведе стравот од странската конкуренција, туку прашањето за деловната корист.
Според него, многу компании се незадоволни бидејќи инвестираат во „AI“, но не гледаат доволен поврат на инвестицијата.
Карп ја повика администрацијата на претседателот Доналд Трамп да не ги забранува отворените модели на „AI“, оценувајќи дека тие во одредени случаи можат да бидат поефикасни за деловните корисници од најнапредните затворени модели.
Разликата меѓу отворените („open-weight“) и затворените („closed“) модели на „AI“ пред сè се однесува на тоа дали внатрешните параметри на моделот се достапни за преземање и натамошно приспособување.
Корисниците можат да ги преземат, да ги извршуваат на сопствена инфраструктура и да ги приспособуваат на своите потреби, додека кај затворените модели контролата останува во рацете на компанијата што ги развила.
„OpenAI“, „Google“ и „Anthropic“ се примери за затворен пристап кон моделите, додека „Meta“, „Mistral“ и „DeepSeek“ застапуваат поотворен пристап.
