Набргу откако казахстанскиот претседател Касим-Жомарт Токаев во саботата, за време на средбата со рускиот претседател Владимир Путин на форумот „Русија – Казахстан“ во сибирскиот град Омск, изјави дека е можен мировен договор за Украина доколку Киев и Москва го замрзнат конфликтот и ги продолжат преговорите, на неговиот предлог реагираше Кремљ.
Портпаролот на Кремљ, Дмитриј Песков, одговарајќи на предлогот на казахстанскиот претседател руската војна против Украина да биде „замрзната“, изјави дека тоа е „невозможно“.
Песков во изјава за руската државна новинска агенција Интерфакс тврдеше дека, имајќи го предвид ставот на Киев, „замрзнување (на конфликтот) како такво е невозможно“.
„За нас главен услов е да ги постигнеме нашите цели“, додаде тој.
На прашањето како Путин реагирал на предлогот на Токаев за време на нивниот разговор, Песков одговори:
„Детално му објасни сè во врска со специјалната воена операција.“
🇰🇿🇷🇺 Kazakh President Tokayev spoke directly to Putin about the war in Ukraine.
— Mario Nawfal (@MarioNawfal) July 25, 2026
He said young Russians and Ukrainians are dying, calling it damage to the “gene pool of the brotherly peoples,” and that the fighting must stop because it only helps their common enemies.
At the…
Песков додаде дека условите за прекин на непријателствата биле поставени од руското Министерство за надворешни работи уште пред две години и дека „сето тоа може да заврши уште денес, до крајот на денот, доколку режимот во Киев донесе соодветни одлуки“.
На средбата со Путин во Омск, Токаев предложи војната меѓу Русија и Украина да биде замрзната.
„Можеби е време овој конфликт да се замрзне и да се вратиме на формулата Истанбул 2.0, бидејќи таму беа постигнати значајни резултати. Потоа – секако со гаранции од големите сили, вклучително и Русија – можеме да продолжиме понатаму“, изјави Токаев.
Москва и Киев водеа преговори во Истанбул кратко по почетокот на руската инвазија, на почетокот на 2022 година, а повторно и во 2025 година. Сепак, тие разговори не донесоа позначителен напредок.
