Резултатите од вонредните анализи на Институтот за јавно здравје (ИЈЗ) за квалитетот на водата во Гостивар се завршени, а според информациите што ги објавија домашните медиуми, констатирани се отстапувања од пропишаните параметри.
Информацијата доаѓа во период кога во Гостивар е прогласена епидемија, а голем број граѓани во изминатите денови побараа медицинска помош поради стомачни тегоби, дијареја и повраќање.
Засега не се објавени конкретните резултати од анализите, ниту е прецизирано за какви отстапувања станува збор. Според објавените информации, Јавното обвинителство побарало извештајот најпрво да биде доставен до нив, по што треба да следи дополнително вештачење, пренесува "Слободен Печат".
Целта на оваа постапка е да се утврди дали евентуално спорната вода навистина стигнала до водоводната мрежа и до чешмите на граѓаните.
Според информациите објавени во медиумите, примероците биле анализирани според критериумите што важат за вода за пиење, кои предвидуваат построги безбедносни стандарди во однос на анализите што се применуваат за други видови вода.
Во меѓувреме, здравствените установи во Гостивар и понатаму бележат голем број нови пациенти со гастроинтестинални симптоми, додека надлежните институции продолжуваат со активностите за утврдување на причините за состојбата и очекуваат дополнителни резултати од истрагата.
