На премиерата на филмот „Одисеја“ во Њујорк, Зендаја ги привлече сите погледи појавувајќи се во раскошна бела креација која изгледаше како да пристигнала од некој друг свет. Фотографиите од црвениот тепих веднаш ги преплавија социјалните мрежи, а модните експерти го коментираа нејзиниот храбар и сосема поинаков избор.

Зендаја во ангелско издание била главната ѕвезда на вечерта

Актерката за оваа посебна пригода избра уникатна креација на француската модна куќа „Matières Fécales“, чија инспирација била речиси надреална – спој на ангелска естетика, скулптурални форми и современа висока мода.

Долгиот бел фустан без прерамки се истакнувал со впечатливо асиметрично деколте, а најголемо внимание привлекле големите бели крилја прицврстени на грбот. Раскошниот долг заден дел од фустанот, кој потсетувал на пердуви, дополнително го нагласил драматичниот ефект додека Зендаја чекорела по црвениот тепих.

Актерката избрала таканаречен „без шминка“ изглед, со акцент на природно блескава кожа, нежно руменило и дискретни усни во неутрална нијанса. Нејзиниот долгогодишен шминкер Ернесто Касиљас откри дека целта била лицето да изгледа свежо, природно и како нежно допрено од сонцето.

„Сакавме кожата да изгледа свежо, сјајно и природно исончано. Шминката беше намерно минимална, а во фокусот беше блескавата кожа и суптилната топлина на местата каде што природно паѓа сонцето“, изјави Касиљас.

Изгледот го надополни долгата плетенка со лежерни прамени околу лицето, дело на нејзиниот фризер Кори Морено, која се спушташе речиси до колковите и дополнително го истакна античкиот стил.

Целиот изглед потсетувал на модна интерпретација на ангел, но на начин својствен само за Зендаја – елегантно, смело и сосема поинаку.

Чевлите што ги збунија сите: Како воопшто одеше во нив?

Иако фустанот беше главната ѕвезда на вечерта, еден детаљ не им избега на љубителите на модата. Зендаја оваа спектакуларна креација ја надополни со бели салонки со зашилен врв и необична, речиси скулптурална потпетица.

Токму чевлите предизвикаа најмногу прашања на социјалните мрежи. Многумина се прашуваа како е можно удобно да се оди во модел што повеќе наликува на уметничко дело отколку на класични чевли.

Сепак, кога станува збор за Зендаја, ваквите модни експерименти не се изненадување. Актерката е позната по тоа што ги поместува границите, а нејзините појавувања на црвениот тепих често наликуваат на внимателно режирани модни перформанси.