Со години наназад Новак Ѓоковиќ привлекува внимание не само со своите успеси на тенискиот терен, туку и со начинот на живот кој подразбира строго регулирана исхрана, внимателен избор на намирници и дисциплина што стана негов заштитен знак.
Иако многумина веруваат дека на неговото мени не можат да се најдат традиционални специјалитети, вистината е малку поинаква. Новак не се откажува од вкусовите што го потсетуваат на детството, но ги подготвува на начин што одговара на неговите прехранбени навики.
Според наводите на луѓето кои соработувале на неговата исхрана, Ѓоковиќ со години уживал во вегански верзии на сарма и ќебапи. Наместо месо се користат состојки од растително потекло, а од рецептите се изоставуваат глутенот, рафинираниот шеќер и состојките од животинско потекло.
Љубица Комлениќ, главната готвачка задолжена за оброците на Ѓоковиќ, сподели детали за неговата исхрана.
„Јаде и балкански специјалитети, како што се сарма со кисела зелка и ќебапи, но за Новак ги подготвуваме на вегански начин. Тоа не се неговите омилени јадења, туку му се блиски, па понекогаш му ги подготвуваме за да го потсетиме на традиционалните вкусови“, рече таа.
На тој начин омилените традиционални јадења го задржуваат препознатливиот вкус, но стануваат полесни за варење и се вклопуваат во режимот на исхрана на еден од најдобрите тенисери на сите времиња.
Ѓоковиќ повеќепати зборувал дека голема пресвртница во неговата кариера била промената на начинот на исхрана откако открил чувствителност на глутен. Од неговото мени исчезнале лебот, тестенините и другите производи што содржат глутен, а набргу забележал повеќе енергија, подобро закрепнување и поголема издржливост на теренот.
