Алберто Барбера, уметнички директор на најстариот филмски фестивал во светот, го опиша Џорџ Клуни како комплетен и харизматичен уметник.
Џорџ Клуни ќе го прими „Златниот лав“ за животно дело на овогодишниот Венециски филмски фестивал, а веста за престижното признание ја пречека во својот препознатлив духовит стил.
Оскаровецот Џорџ Клуни ќе го прими „Златниот лав“ за животно дело на овогодишното издание на фестивалот во Венеција кој ќе се одржува од 2-ри до 12-ти септември.
Откако дознал дека ќе ја добие престижната награда, познатиот актер не го криел своето воодушевување, а ја искористил и можноста да се пошегува.
„Овој фестивал без сомнеж ми е омилен и да се добие „Златниот лав“ е огромна чест. Тоа веројатно значи и дека сум стар, но ќе го прифатам“, рекол 65-годишниот американски актер, режисер и продуцент.
Алберто Барбера, уметнички директор на најстариот филмски фестивал во светот, го опиша двократниот добитник на Оскар како комплетен и харизматичен уметник.
„Неговите ликови не делуваат само уверливо, туку и привлечно, пристапно и човечно, благодарение на неговиот неспорен шарм“, рекол Барбера.
Тој додал дека харизмата на Клуни „е изградена врз неговата автентичност, а не врз неговиот имиџ, бидејќи неговата заводлива страна никогаш не била само естетска“.
„Совршена комбинација од ѕвезден гламур од минатите времиња, извонреден професионализам и современа чувствителност“, навел Барбера како карактеристики на разновидноста на актерот.
