Полските безбедносни служби протераа девет Украинци и двајца Белоруси поради сомнение дека користеле руски пари за регрутирање украински бегалци за организирање протести во Полска против владата во Киев. Веста беше објавена во понеделник од Агенцијата за внатрешна безбедност (ABW), пренесе Ројтерс.

Полска долго време ги обвинува Русија и нејзиниот сојузник Белорусија за водење хибридна кампања што вклучува саботажи, кибернапади и дезинформации од почетокот на руската инвазија на Украина во 2022 година. Москва постојано ги отфрла ваквите обвинувања.

Поттикнување на протестите

„Организаторите имале намера постепено да влијаат врз украинската бегалска заедница во Полска и да ја користат оваа група за промовирање политички слогани“, се вели во соопштението на ABW.

Се додава дека за поттикнување на протестите биле користени емоционални теми, како што се корупциски скандали што ја потресоа владата на украинскиот претседател Володимир Зеленски и други домашни политички случувања.

Операциите се активни од минатата есен

Според агенцијата, протераните лица имале врски со Русија и Белорусија и ги извршувале своите активности од есента 2025 година. „Ова е пример за операции што одат надвор од рамките на класичната агресија, а нивната цел е да ја поткопаат јавната доверба, да поттикнат тензии и да ги искористат луѓето што бегаат од војната како инструменти на руско влијание“, соопшти ABW.

Руската амбасада во Варшава не одговори веднаш на барањето за коментар.