Дејли Мејл разговарал со жителите на пет француски градови, од Лил до Монпелје, за тоа каков е животот во екстремна топлина. Многумина рекле дека нивните рутини се целосно превртени наопаку.

„Се чувствувам како голем, тром полжав“

Жителка на Бретања рекла дека животот практично им застанал. „Целосно ја променивме нашата дневна рутина. Се одмараме, не чистиме, не спортуваме, не шетаме, одиме само на шопинг за најнеопходните работи и не готвиме. Си легнуваме многу подоцна, па заморот се насобира“, рекла таа.

Додала дека работното време е исто така приспособено, па работата започнува во 7:15 часот наместо во 8 часот наутро. „Ужасно се справувам со ова. Не можам да ја поднесам оваа агресивна топлина. Имам силни главоболки и нема ништо што можам да направам во врска со тоа. Што е полошо, се чувствувам како голем, тром полжав“, се пожалила таа.

Животот во Лион исто така морал да се адаптира. Луј (47), го потврдил ова. „Моравме да се адаптираме бидејќи температурите се екстремно високи. Рестораните ги менуваат своите менија и особено сакаат да истакнат дека имаат климатизирани простори“, раскажал тој.

Тој додал дека и работниот ритам се менува. „Работата на градилиштата запира напладне, а работниот ден започнува во 6 или 7 часот наутро“, истакнал Луј. Тој исто така ја споменал и дебатата што се води во Франција. „Сега се води дебата за тоа дали да се воведе климатизација во болниците и училиштата. Еколозите велат дека ова само ќе ја влоши ситуацијата. Наместо тоа, би било подобро да се адаптираат градовите, на пример со садење дрвја и градење згради отпорни на топлина“, смета Луј.

Адаптации од север кон југ

Франсоа (67) од Лил изјавила за Дејли Мејл дека поголемиот дел од деновите ги поминува во затворен простор. „Не излегувам многу. Ги отворам прозорците наутро и ги затворам околу 10 часот. Остатокот од денот читам и се одморам“, рекла таа.

Во Лил, спортските настани, групните собири и прославите се откажани поради црвениот аларм. „Не сме навикнати на овие промени. Веќе размислувам како ќе се подготвам за следниот топлотен бран – однапред да направам некој голем шопинг, да купам книги и сложувалки и да купам модерен преносен клима-уред“, додала таа.

Во долината на Лоара, 85-годишната Женевјев има свои методи. „Не сум љубител на вода, но се принудувам да пијам многу. Ставам шише во фрижидер за да биде подносливо. Дремам кога чувствувам вртоглавица и избегнувам мрсна и тешка храна. Јадам салати, овошје и јогурт“, рекла таа.

На југот на Франција, во Монпелје, ситуацијата е малку поинаква. „Не го променивме многу нашиот секојдневен живот. Се адаптиравме, повеќето места имаат климатизација. Продавниците и рестораните остануваат отворени. Бараме освежување во водата – во езера, реки, море, базени и фонтани. Ги држиме ролетните спуштени поголемиот дел од денот“, раскажала 41-годишната Марија.

Туристка: „Моите апостолки се топат на тротоарот“

Туристите исто така се борат со високите температури во Франција. Британката Тори Томас (38) од Лондон, која престојува во Бордо, го опишала градот како „морничаво пуст“ бидејќи луѓето остануваат во затворен простор или одат на плажа. Таа рекла дека топлината е толку интензивна што чувствува мачнина по само десет минути на сонце. „Пијам шест до осум големи шишиња вода секој ден“, истакнала таа.

Таа исто така опишала како асфалтот и тротоарите станале толку жешки што нејзините апостолки почнале да се лепат за површината. Според неа, терасите на рестораните и кафулињата, кои обично се полни со луѓе, сега се празни.

„Многу ресторани затвораат порано или воопшто не отвораат. Ако се отворени, служат само ладна храна. Прво, затоа што никој не сака да јаде ништо топло, а второ, поради луѓето во кујните кои би морале да готват на оваа жештина“, нагласила Британката.

Кога конечно ќе стивне топлотниот бран?

Метеоролозите очекуваат најлошиот дел од топлотниот бран во Западна Европа да почне да стивнува до крајот на оваа недела, но топлината ќе се движи кон Централна и Југоисточна Европа во следните неколку денови, каде што ќе остане до почетокот на јули.

Температурите постепено ќе опаѓаат во Франција, Шпанија и Португалија, додека Балканот и земјите од Источна Европа ќе бидат под влијание на многу топол воздух уште неколку денови.