Американската војска потврди напади врз Иран - Џеј Ди Венс: Насилството ќе биде пречекано со насилство - Иран: Нè нападнаа среде преговори

Американскиот претседател Доналд Трамп навести дека САД ќе одговорат на иранскиот напад врз трговски брод, изјавувајќи „ќе дознаете“, кога беше прашан дали Техеран ќе се соочи со последици.

Кратко потоа, иранските медиуми јавија дека во Сирик, во јужниот дел на Иран, се слушнала експлозија, но не беше познато што ја предизвикало.

Порталот „Аксиос“ објави дека американските вооружени сили извеле напад во Ормуски Теснец.

Подоцна, Централната команда на вооружените сили на САД (ЦЕНТКОМ) потврди дека Вашингтон изврши напади врз Иран.

Според соопштението, американски авиони погодија складишта за ирански ракети и беспилотни летала, како и крајбрежни радарски системи, како одговор на нападот на Техеран врз трговски брод во Ормуската Теснина.

Американскиот потпретседател Џеј Ди Венс, по американските напади извршени по иранскиот напад врз трговски брод, изјави дека „на насилството ќе се одговори со насилство“.

„Доколку имаат несогласувања околу начинот на кој се спроведува меморандумот за разбирање, можат едноставно да се јават по телефон“, напиша Венс на социјалната мрежа Икс.

Иранскиот Корпус на исламската револуционерна гарда (ИРЦГ) соопшти дека ќе одговори „брзо и решително“ на најновите американски напади врз Иран, јави иранската државна телевизија.

ИРЦГ соопшти дека го одби американскиот напад врз островот Сирик, кој се наоѓа на брегот на Ормуската Теснина. Од друга страна, Ебрахим Азизи, шеф на одборот за национална безбедност на иранскиот парламент, објави на социјалните мрежи дека САД „уште еднаш го нападнале Иран среде преговори“.

„Ова непромислено кршење на примирјето, како и секогаш, ќе доведе до нивно повлекување и жалење. Префрлањето на вината повеќе не поминува“, наведе Азизи во својата објава.