Додека репрезентациите на големите натпреварувања вообичаено добиваат повеќе комплети опрема и по секој натпревар користат нови дресови, во репрезентацијата на Гана одлучија да тргнат во сосема спротивна насока.
Поради финансиски ограничувања и мерки за штедење воведени од Фудбалскиот сојуз на Гана, на репрезентативците им е забрането да ги менуваат дресовите за време на Светското првенство.
Наместо тоа, истите комплети ќе се користат од натпревар на натпревар во текот на целиот турнир.
Одлуката предизвика изненадување во фудбалските кругови, бидејќи на најголемата светска сцена е речиси незамисливо една репрезентација да користи исти дресови на повеќе натпревари. Сепак, раководството на Сојузот проценило дека дополнителните трошоци не се оправдани и на играчите им дало јасни инструкции внимателно да ја чуваат опремата.
Тоа во пракса значи дека нема да има вообичаена размена на дресови со противниците по завршувањето на натпреварите, а секој репрезентативец ќе мора посебно да внимава на својот комплет опрема. Резервни гарнитури нема во доволен број, па секој дрес е од големо значење.
Посебна улога за време на турнирот има економот на репрезентацијата. По секој натпревар негова задача е да ја собере целата опрема, да го организира нејзиното перење и да ги подготви дресовите за следниот настап.
Според информациите од таборот на Гана, и домашната и гостинската гарнитура ќе се користат во текот на целото натпреварување, а ќе се менуваат само во зависност од противникот и околностите на натпреварот.
Додека поголемиот дел од репрезентациите на големите турнири располагаат со речиси неограничени количини опрема, Гана одлучи да испрати поинаква порака. Во време кога фудбалот прерасна во глобален бизнис вреден милијарди евра, една од репрезентациите реши да штеди дури и на дресови.
Денес
