Претседателката на Европската комисија, Урсула фон дер Лајен, наводно нема намера да побара уште еден мандат на чело на извршното тело на Европската Унија по истекот на актуелниот мандат во 2029 година.
Информацијата, според „Политико“, за време на приватен состанок со високи функционери на Комисијата ја соопштил шефот на нејзиниот кабинет, Бјорн Зајберт. Како што наведува „Политико“, Зајберт на почетокот на јуни, на приватна вечера со околу 15 високи функционери на Европската комисија, се обидел да ги отфрли критиките дека реорганизацијата во рамките на Комисијата претставува нов обид за централизација на моќта во рацете на претседателката.
Според тврдењата на двајца високи функционери запознаени со разговорот, Зајберт нагласил дека фон дер Лајен не е заинтересирана да се кандидира за трет мандат. Со тоа одговорил на обвинувањата дека институционалните промени што ги спроведува служат за зацврстување на нејзиното политичко влијание во иднина.
Портпаролка на Европската комисија претходно за „Политико“ изјавила дека претседателката во моментов е „целосно посветена на својот мандат и на клучните предизвици со кои се соочува Европа“, додавајќи дека за можната кандидатура во 2029 година ќе има време да се разговара подоцна.
За разлика од претседателите на Европскиот совет, чии мандати се ограничени на два, за претседателите на Европската комисија не постои такво формално ограничување. Досега само Жак Делор извршувал три последователни мандати на чело на Комисијата. Фон дер Лајен до европските избори во 2029 година ќе наполни 70 години.
Додека нејзините поддржувачи тврдат дека поцврстото управување од врвот на Комисијата ѝ помогнало на Европската Унија да се справи со големите кризи, вклучувајќи ја војната во Украина и трговските тензии со Соединетите Американски Држави, критичарите предупредуваат на сè поизразена централизација на процесот на одлучување за време на нејзиниот втор мандат.
„Политико“ наведува и дека еден од учесниците на вечерата директно го прашал Зајберт зошто претседателката би трошела политички капитал на институционални реформи пред крајот на мандатот, доколку не планира да остане доволно долго за да има корист од нив.
Според изворите запознаени со разговорот, Зајберт дури трипати повторил дека Фон дер Лајен не планира повторно да се кандидира, истовремено нагласувајќи дека процесот на реорганизација на Европската комисија сè уште не е завршен.
