Шведските воздухопловни сили во петокот пресретнале руски воени авиони кои летале во близина на шведскиот воздушен простор над Балтичкото Море, соопштија шведските вооружени сили.

Според војската, борбените авиони „Грипен“ биле подигнати во воздух во два одделни наврати поради присуството на руски авиони од типовите Су-24 и Су-34. Притоа не било регистрирано нарушување на шведскиот воздушен простор.

Шведскиот премиер Улф Кристерсон оцени дека станува збор за дел од поширок модел на руски воени активности во регионот на Балтичкото Море.

„Во ист ден нашите воздухопловни сили двапати подигнаа борбени авиони ЈАС 39 Грипен за да пресретнат руски воени летала во близина на шведскиот воздушен простор. Повторувањето на руските активности над Балтичкото Море е сериозна работа“, напиша Кристерсон на социјалните мрежи.

Тој додаде дека брзата реакција на воздухопловните сили покажува зошто постојаната подготвеност е неопходна секој ден.

Иако овојпат не дошло до нарушување на воздушниот простор на Шведска, премиерот предупреди дека ваквите ситуации можат брзо да ескалираат.

„Важно е Шведска, заедно со своите сојузници, да ги открива, идентификува и пресретнува руските воени авиони за да го заштити својот воздушен простор“, порача Кристерсон.

Зголемени тензии во регионот

Инцидентот е последен во низата слични случаи во балтичкиот регион по почетокот на руската инвазија врз Украина.

Во изминатите месеци и други земји членки на НАТО кои излегуваат на Балтичкото Море пријавија слични активности на руската воена авијација во близина на нивниот воздушен простор.

Во мај годинава, Полска пресретна руски извидувачки авион над меѓународни води во Балтичкото Море, а полските власти тогаш летот го оценија како провокација.

Шведска, која во последните години значително ги засили безбедносните мерки и соработката со НАТО, внимателно ги следи руските воени активности во регионот, особено поради зголемените тензии во северна Европа и војната во Украина.