Функцијата на органите во телото на пациентот беше одржувана речиси пет дена со согласност на неговото семејство, а во првите 24 часа немало знаци на отфрлање на трансплантираните органи, се наведува во студијата објавена во научното списание „Med“.

Поголемиот дел од процедурите во кои свински органи се трансплантираат кај луѓе – познати како ксенотрансплантација – вклучуваат само еден орган. Мал број луѓе досега примиле свински органи, вклучувајќи срца, бубрези, делови од црн дроб и бели дробови, а клиничките испитувања на живи пациенти веќе се во тек во САД и Кина.

„Досега кај луѓе биле трансплантирани само делови од свински црн дроб“, изјави клиничарот и научник Сјујонг Сун, кој ја предводеше најновата процедура во Втората придружна болница на Медицинскиот универзитет Гуангси во Нанинг, Кина.

Според Леонардо Риела, трансплантацијата на свински бубрези и црн дроб во рамки на една иста процедура претставува единствен медицински подвиг, а студијата покажува дека ксенотрансплантацијата на повеќе органи е возможна. Научниците веќе подолго време ја истражуваат употребата на свински органи како потенцијално решение за хроничниот недостиг од донорски органи.

Први резултати по трансплантацијата

Човекот кој ги примил свинските органи страдал од тешко хронично заболување на бубрезите и мозочно крварење пред лекарите да потврдат мозочна смрт. Неговиот црн дроб бил здрав и бил трансплантиран кај жив пациент, пишува „The Sun“.

Пациентот добил органи од свиња кај која биле направени шест генетски модификации. Биле додадени три човечки гени за да се намали ризикот од нарушувања во згрутчувањето на крвта, а три свински гени биле отстранети за да се намали можноста за отфрлање на органите.

Во рок од 19 часа по трансплантацијата, свинскиот црн дроб почнал да лачи жолчка и покажувал знаци на нормално функционирање, известува истражувачкиот тим. Нивото на креатинин и уреа – отпадни материи кои биле покачени поради заболувањето на бубрезите – се вратило во нормални граници по трансплантацијата на свинските бубрези, што укажува дека и тие функционирале успешно.

Сепак, 36 часа по операцијата, тимот забележал рани знаци на отфрлање на органите. На пример, свинските клетки во црниот дроб и бубрезите постепено биле заменувани со човечки клетки, што покажува дека имунолошкиот систем на пациентот ги препознал органите како туѓи.

Исто така, биле забележани мали подрачја на одумирање на ткивото и згрутчување на крвта во свинскиот црн дроб.

Авторите на студијата забележале дека трансплантираните органи содржат покачено ниво на вид имунолошки клетки наречени S100A12+, кои се поврзани со воспалителни процеси. Тие сметаат дека овие клетки би можеле да бидат цел на идни терапии со лекови за да се намали ризикот од долгорочно отфрлање на органите.

Иднината на трансплантацијата?

Риела смета дека е малку веројатно мултиорганските ксенотрансплантации да станат вообичаена практика во блиска иднина, бидејќи и трансплантациите на повеќе човечки органи се исклучително сложени и високоризични процедури.

Сепак, ваквиот пристап би можел да биде од голема корист за пациентите со откажување на црниот дроб, состојба која често доведува и до откажување на бубрезите.

Истражувачкиот тим најавува дека пред да започнат операции на живи пациенти, ќе бидат спроведени дополнителни процедури на клинички мртви лица и живи мајмуни.

Научниците исто така мора да потврдат дека не постои ризик од пренесување вируси или бактерии од свинските органи на луѓето, што претставува еден од клучните предуслови за поширока примена на оваа револуционерна медицинска технологија.

Доколку идните истражувања ги потврдат досегашните резултати, ксенотрансплантацијата би можела да отвори ново поглавје во медицината и да понуди решение за милионите пациенти ширум светот кои со години чекаат донорски орган.