Поранешниот градоначалник Костадин Костадинов ја критикуваше СДСМ за предлогот за промена на пол кај малолетници без согласност од родителите, на што од партијата одговорија дека законот од 2023 година е повлечен и не е дел од нивната нова програма. Во дебатата се вклучи и ВМРО-ДПМНЕ која ја обвини СДСМ за планови што се одбиени по реакциите од јавноста.
Нова политичка дебата се отвори во јавноста откако поранешниот градоначалник на Струмица од СДСМ, Костадин Костадинов, преку статус на социјалните мрежи рече дека Законот за матична евиденција предвидувал промена на пол на малолетни лица без согласност од родителите.
Тој повика на консолидација и порача дека огромното мнозинство во партијата овојпат мора да биде на иста страна и да не дозволи ваквите решенија да поминат, со цел СДСМ да се подигне како државотворна и прогресивна партија.
На ваквиот став експресно реагираа од матичната партија СДСМ, од каде што порачаа дека немаат време за дефокус и демантираа дека ова е дел од нивните тековни планови. Од СДСМ појаснија дека законот за кој зборува Костадинов е од 2023 година и дека тој закон веќе бил повлечен, нагласувајќи дека истиот нема никаква врска со нивната нова програмска платформа.
Во дебатата се вклучи и владејачката ВМРО-ДПМНЕ, од каде што обвинија дека опозициската партија е фатена на дело. Според ВМРО-ДПМНЕ, со самата своја реакција СДСМ потврдила дека имала во план да дозволи промена на пол на малолетни деца без дозвола од родителите, но дека тој проект бил стопиран поради реакциите на јавноста и нивната партија. Од владејачката партија додадоа дека СДСМ повторно е во кавга со свој поранешен градоначалник и порачаа дека и денес, како и претходно, остануваат против ваквите eксперименти во законодавството.
