Во Хрватска, меѓу најпопуларните предмети од поранешна Југославија се токму оние што исчезнуваат веднаш штом ќе се појават на страниците за онлајн продажба. Еден таков предмет повторно стана хит на интернет, а станува збор за легендарната ѕидна кујнска вага на „Gorenje“, која некогаш беше речиси неизбежен дел од секоја кујна во Југославија.

Фотографиите од препознатливата вага од 80-тите години предизвикаа лавина коментари на социјалните мрежи. Многу корисници пишуваат дека и денес ја користат, додека помладата генерација признава дека не разбира како овој уред всушност функционира.

Работи веќе 50 години

Еден корисник прашал дали вагата мери така што храната се става директно во малиот капак, што веднаш предизвикало дискусија меѓу постарите, кои објасниле дека садот може да се одвои од самата вага. Сепак, најголемиот дел од коментарите не се однесувале само на начинот на користење, туку и на спомените од некогашните кујни.

Многумина пишувале дека речиси и немало домаќинство без ваква вага, заедно со задолжителната мелница за кафе, фенот за коса и другите уреди карактеристични за поранешна Југославија.

Бројни корисници тврдат дека нивните ваги и денес работат подеднакво прецизно како и пред неколку децении.

Некои велат дека ги користат уште од 1970-тите, додека други додаваат дека нивната вага и понатаму виси на ѕидот и редовно се користи за мерење состојки за ручек, колачи и торти.

Распродажба на некористени примероци

„Сè уште е на ѕидот, најдобрата вага“, гласи еден од коментарите.

Многумина прашувале каде можат да ја купат оваа вага, бидејќи, како што велат, е многу поквалитетна од денешните модели, пишува „Dnevno.hr“.

На сајтот за онлајн продажба „Njuškalo“ целосно нов и некористен примерок се продава за 100 евра, додека половни модели можат да се најдат и за 15 евра.